2024-жылдын 2-декабрында Айтматов РИИБге 1998-ж.т. келин арыз менен кайрылган. Ал өз арызында 2024-жылдын ноябрь айында “Ватсап” социалдык тиркемесине белгисиз номерден шилтеме келип, онлайн акча табууну сунуштап, натыйжада “МБанк” электрондук капчыгындагы көп суммадагы акчасынан куру кол калганын билдирген. Бул тууралуу Талас облустук ИИБнин маалымат кызматы билдирди.
Аталган факты Айтматов милициясы тарабынан каттоого алынып, териштирүү иштери башталган. Текшерүү учурунда арыз ээсине белгисиз жаран “Ватсап” социалдык тиркемеси аркылуу байланышып, онлайн иштеп, акча табууну сунуштаган. Ал сунушта арыз ээси “Ватсапка” келген ссылкаларды башкалар менен бөлүшүп туруусу керек болгон. Алгач бөлүшкөн ссылкалары үчүн 200, 500 сом өлчөмүндөгү акчалар арыз ээсинин “Мбанк” карточкасына келип түшүп турган.
Арыз ээсин интернет алдамчылары бул жумушка азгырып алган соң, мындан дагы көбүрөөк акча табууну сунуштаган. Сунуш боюнча арыз ээси интернет алдамчысынын электрондук капчыгына акча салуусу керек болгон. Алгач арыз ээси 2024-жылдын 8-ноябрында 12 800 сом акча салган. Бирок салган акчасы кайра толук кайтарылбагандыктан, интернет алдамчысы дагы акча салып, көбүрөөк кайтарып алууну сунуштаган.
Салган акчаларын кайра кайтарып алуу үчүн арыз ээси 9 жолу ар түрдүү суммадагы акчаларды которуп, жалпы суммасы 1 027 800 сомду түзгөн. Арыз ээси жогоруда көрсөтүлгөн сумманы 20 күндөн ашуун убакыт ичинде бөлүп-бөлүп которуп турган. Жыйынтыгында буга чейинки байланышып жаткан номер өчүк болуп, арыз ээси алданып калганын айтып, милиция келген. Арыз ээси интернеттен онлайн акча табууну сунуштаган жаранды бир дагы жолу көргөн эмес, бирок оңой акча табуу азгырыгына алданып калган.
Бул факты Айтматов РИИБдин кылмыштардын бирдиктүү реестрине Кыргыз Республикасынын Кылмыш-жаза кодексинин 222-беренеси (Кылмыштуу жол менен алынган кирешелерди мыйзамдаштыруу (адалдоо)) менен катталып, кылмыш иши козголгон.
Айтматов РИИБдин кылмыш иликтөө бөлүмчөсүнүн кызматкерлери тарабынан жүргүзүлгөн иликтөө иштеринин натыйжасында, кылмыш ишине шектүү катары Нарын шаарындагы банктардын биринин кызматкери, 2000-ж.т. Т.Р. кармалып, жанынан чет өлкөлүк 1 банктык карточка, Кыргызстандын 6 банктык карточкалары, 1 төлөм картасы жана “POKO х5” үлгүсүндөгү уюлдук телефону табылып алынган. Тергөө амалдарынын жүрүшүндө арыз ээсинин акчалары шектүүнүн электрондук капчыгына жана ага таандык болгон банктык эсебине которулгандыгы такталып, убактылуу кармоочу жайга киргизилген.
Азыркы учурда шектүүнүн башка кылмыш иштерине тиешеси бар же жоктугун тактоо аракеттери жүргүзүлүүдө.



















