Америкалык криптовалюта платформасы Coinbase чоң киберчабуулга туш болду. Хакерлер айрым колдонуучулардын жеке маалыматтарын уурдап кетишкен. Компаниянын билдирүүсүнө ылайык, чабуулдан келген финансылык зыян 180 миллион доллардан 400 миллион долларга чейин жетиши мүмкүн.
Бул тууралуу TechSpot басылмасы кабарлады.
📧 Чабуул кантип аныкталды?
Coinbase 11-майда окуя тууралуу кабардар болгон. Белгисиз киберкылмышкер электрондук почта аркылуу компания менен байланышып, айрым аккаунттар жана ички документтер боюнча купуя маалыматтарды колуна түшүргөнүн билдирген.
Компаниянын билдирүүсүнө ылайык, уурдалган маалыматтардын арасында төмөнкүлөр болушу мүмкүн:
-
колдонуучулардын аттары,
-
электрондук жана почта даректери,
-
банк эсебинин шифрленген номерлери,
-
социалдык камсыздандыруу номерлери.
Бирок Coinbase белгилегендей, хакерлер колдонуучулардын сырсөздөрүнө, жеке ачкычтарына (private keys) же түз каражаттарына жетише алышкан эмес.
🔐 Кантип киришкен?
Компания маалымдагандай, киберчабуул чет өлкөлөрдө жайгашкан колдоо кызматкерлеринин жана подрядчылардын тармагы аркылуу ишке ашкан. Бул кызматкерлердин айрымдары пара алып, хакерлерге ички тутумдарга уруксатсыз кирүүгө жардам беришкен.
Coinbase бул кызматкерлер менен иш келишимдерин дароо токтоткон жана маалыматы уурдалган болушу мүмкүн болгон кардарларга кабарлаган.
💰 Хакерлердин талаптары жана компаниянын жообу
Киберкылмышкерлер 20 миллион доллар өлчөмүндө “кылмышты жашыруу үчүн” акча талап кылышкан. Бирок Coinbase бұл талапты четке каккан.
Анын ордуна, платформа:
-
укук коргоо органдары менен кызматташууда,
-
киберкылмышкерлерди кармоого жардам бергендерге 20 миллион долларлык сыйлык фондун түздү.
🛡️ Коопсуздук чаралары
Coinbase төмөнкүдөй чараларды көрүп жатканын билдирди:
-
кооптуу аракеттерди аныктоо системасын өркүндөтүү,
-
коопсуздук саясатын күчөтүү.
Биржа утурумдук алдоо менен колдонуучулардан криптоактивдерди тартып алгандар болсо, зыянды толугу менен төлөп берүүгө убада берди.
Бул окуя криптобиржалар үчүн коопсуздук маселеси канчалык маанилүү экенин дагы бир жолу көрсөттү.
















