Финансы рыногун көзөмөлдөө кызматынын мурдагы төрагасы Юруслан Тойчубеков MCN Coin долбоорунун негизинде кармалды.
Бул тууралуу күч түзүмдөрүндөгү жеке булактарына шилтеме берүү менен “Спутник” агенттиги билдирди.
Басылманын жеке булактары билдиргендей, Юруслан Тойчубеков кечээ, 10-февралда Улуттук коопсуздук мамлекеттик комитети тарабынан кармалган.
MCN Coin уюштуруучуларынын бири Исрадин Субанбеков УКМК тарабынан кармалгандан кийин мунун баары алдамчылык экенин, элден алынган акчаны кайтарып бере албай тургандыгын билдирген.
Анын айтымында, МСN Coin криптовалютасынын иштегенине 1,5 жыл болгон. Өзүнүн туруктуу блокчейни жок. Бирок ал биржага кирип кеткен. Ошол эле учурда криптовалюта долбоорун үч адам түзгөндүгүн, Финансылык рынокту жөнгө салуу жана көзөмөлдөө кызматынын мурунку жетекчиси Юруслан Тойчубеков аларга кеп-кеңешин берип тургандыгы боюнча билдирген.
Ал Финансы рыногун жөнгө салуу жана көзөмөлдөө кызматы MCN Coin виртуалдык активи мамлекеттик каттоодон өтпөгөнүн, Кыргызстанда уруксат берилген виртуалдык активдердин реестринде да жок экенин белгилеген.
Маалыматарга караганда, MCN Coin мамлекеттик каттоодон өтүү үчүн 5 жолу кайрылган.
Кечээ, 10-февралда ички иштер министрлигинин кылмыш иликтөө башкы башкармалыгынын кызматкери Данияр Закиров “Биринчи радиого” маек берип жатып, MCN coin криптовалюта сатып алып, алданып калган 898 адамга 1 млн 700 миң доллардан ашык каражат кайтарылып берилгендигин билдирген.
Маалымат иретинде:
“Ички иштер министрлиги бул боюнча 2024-жылы 12-сентябрда кылмыш-жаза кодексинин 209-беренесинин («Алдамчылык») 3-бөлүгү менен иш козгогон. Азыр тергөө иштери жүрүп жатат. Материалдар Бишкек шаарынын эки райондук милициясында каралууда”,- деди ал.
7-февралда Бишкек шаарынын Биринчи май райондук соту MCN Coin криптовалюта сатып, 2,5 млн долларды алдап алууга шектүүлөрдү камакка алды. М.Д.С. жана С.И.С. 5-апрелге чейин камакка алынды.
Буга чейин социалдык тармактарда MCN Coin монетасын сатып алып, аны 100 миң долларга чейин көбөйтүүгө мүмкүн экендигине чакырык жасаган видеолор тараган.
5-февралда Улуттук коопсуздук мамлекеттик комитети (УКМК) бул ишке шектүүлөрдү кармаган, анын бири Дубайга учууга камынып жаткан.
Ал эми MCN сoinдин уюштуруучусу И. С. 2,5 млн. доллар каражат иштеп тапкандыгын жана жарандардын акчасын кайтарып бере албасын айткан видео да тараган.



















