Ирандын баш калаасы Тегеранда Палестиналык ХАМАС кыймылынын Саясий бюросунун башчысы Исмаил Ханияны акыркы сапарга узатуу зыйнаты өтүп жатат.
Коштошуу иш-чарасына расмий бийликтин өкүлдөрү, анын ичинде жаңы шайланган президенти Масуд Пезешкиан баш болгон миңдеген жарандар чогулду.
Тегеран университетинде өтүп жаткан коштошуу зыйнатында маркумдун жаназасын Ирандын жогорку жана руханий лидери Аятолла Али Хаменеи окуду.
ХАМАСтын лидери Исмаил Хания 31-августка караган түнү Тегеран шаарында жок кылынган. Тегеранга ал 30-июлда Ирандын жаңы шайланган президенти Масуд Пезешкиандын инаугурациясына катышуу үчүн барган.
Иран бийлиги чабуул Ханиянын Тегерандагы резиденциясына жасалгандыгын, аны менен кошо бир жан сакчысы каза тапканын билдирген.
Ханиянын каза болгонун ХАМАС да тастыктап, анын өлүмүнө Израиль менен АКШ жоопкер экенин айтып, бул кадам жоопсуз калбай тургандыгын эскертишти.
Бул окуя боюнча Израиль тараптан расмий билдирүү жасала элек болсо, Пентагондун башчысы Ллойд Остин ХАМАСтын Саясий бюросунун башчысынын өлүмү жана буга Израилдин катыштыгы тууралуу эч нерсе айта албай турганын билдирди.
Ирандын жогорку лидери Али Хаменеи Израиль Ханияны өлтүрүү менен өздөрүн катаал жазага кириптер кылганын билдирди.
Ханиянын өлүмүнө байланыштуу Иранда 31-июлдан 2-августка чейин жалпы аза күтүү жарыяланган.
Ханиянын өлүмүнө байланыштуу Тегеранда ири жүрүштөр өткөрүлөрү күтүлүүдө.
ХАМАСтын лидери Ирандагы коштошуу аземинен кийин жума күнү Катарда жерге берилет.


















