Ирандын шейит болгон руханий лидери Али Хаменеи жана анын үй-бүлө мүчөлөрүнүн сөөгү (кызы, келини, күйөө баласы жана 14 айлык небереси) салынган унаа борбор калаанын белгиленген көчөлөрү аркылуу жыла баштады.
Маркумдар менен коштошууга миллиондогон адамдар чогулду.
Селдей агылган эл табыттар салынган унааны курчап, борбордук Энгелаб көчөсү аркылуу Азади аянтына бара жатат.
Бийликтин маалыматына ылайык, жүрүшкө 15 миллиондон 20 миллионго чейин адам катышат.
Хаменеи менен коштошуу зыйнаттары 3-июлда Тегерандагы “Мосалла” комплексинде башталып, ал күнү Ирандын жана 100гө жакын чет өлкөлөрдүн расмий адамдары аятолланын элесине таазим кылышкан. 4-июль күнү эртең менен ошол эле диний комплексте Али Хаменеи менен элдик коштошуу зыйнаты башталган.
Бүгүн, 6-июль Тегерандагы коштошуу аземинен кийин маркумдун сөөгү Ирандын диний борбору саналган Кум шаарына жеткирилет. 8-июлда анын сөөгү Иракка жөнөтүлүп, ал жерде Кербела жана Наджаф шаарларында өзүнчө коштошуу аземдери өткөрүлөт.
Маркумдун сөөгү 9-июлда өзү туулуп-өскөн Мешхед шаарында жерге берилет.
Ирандын жогорку руханий лидери аятолла Али Хаменеи үстүбүздөгү жылдын 28-февралында АКШ менен Израилдин Иранга каршы баштаган аскердик аракеттеринде шейит болгон. Ал чабуулда Хаменеи менен кошо кызы, келини, күйөө баласы жана 14 айлык небереси да шейит кеткен.

















