Индонезиянын жээктеринде күчү 6 баллга жакын жер титирөө катталгандыгын Европа-Жер ортолук деңиз сейсмологиялык борборунун билдирүүсүнө таянып, ТАСС агенттиги жазды.
Маалыматта белгиленгендей, жер титирөөнүн очогу 1 миллион 400 миңдей адам жашаган Суматра аралында жайгашкан Палембанг шаарынан 300 чакырым түштүк-батыш тарапта болгон.
Силкинүүнүн очогу 55 км тереңдикте жайгашкан. Жабыркагандар жана кыйроолор тууралуу маалымат жок.
Индонезияда жер титирөө кадимки көрүнүш
Өлкө планетанын эң сейсмикалык активдүү зонасында жайгашкан жана “Тынч океандагы өрт шакекчеси” деп аталган кубаттуу тектоникалык жарака – бир бөлүгү болуп саналат.
Индонезияда жыл сайын сейсмологдор күчү Рихтер шкаласы боюнча 4,0 баллдан ашкан 7000дей жер титирөөнү катташат.
Дүйнөлүк тарыхтагы эң күчтүү цунамилердин бири 1883-жылдын 26-августунда Индонезиядагы Кракатоа жанар тоосунун атылышынан улам келип чыккан.
Жалпысынан Ява жана Суматра жээктеринде 295 шаар жана айыл кыйрап, 36 миңден ашуун адам каза болуп, жүз миңдеген адамдар үй-жайсыз калгандыгы менен белгилүү болгон.
1992-жылы 12-декабрда Рихтер шкаласы боюнча 6,8 баллга жеткен табиягый кырсык Индонезияда жайгашкан Флорес жана Бали аралдарынын көп бөлүгүн кыйраткан. Жер титирөөнүн толкуну бийиктиги 26 метрге жеткен цунамиге алып келип, 2200 адам көз жумган.
1994-жылы 17-февралда Суматрадагы 7,2 баллдык жердин силкиниши жер көчкүлөрдүн келип чыгышына себепкер болуп, 200дөн ашык адам каза болгон.
1995-жылдын 7-октябрында аралдагы күчү 7 баллга жеткен зилзала 10 000дей үй, батир жана коомдук имараттарды талкалкап, 200 киши набыт болгон.
1996-жылдын 18-февралындагы 7,5 баллдык жер титирөөнүн эпицентри Тынч океанда, Биак аралынан болжол менен 110 км чыгыш тарапта катталып, 100 адамдын өмүрүн алган.
30-ноябрь, 1998-жылы зилзаланын очогу Индонезиянын Мангул аралынын аймагында, Жакартадан 2000 км алыстыкта жайгашып, 1000ден ашык үй жана турак жай имараттары талкаланган. 50гө жакын жергиликтүү тургундар кайтыш болгону маалымдалган.
4-июнь 2000-жылы аталган аралда күчү 8 баллга жеткен жердин силкинүүсү катталып, 60 адамдын өлүмүнө себепчи болгон.
2004-жылдын декабрынын аягында Түштүк жана Түштүк-Чыгыш Азияда акыркы 45 жылдагы эң күчтүү зилзала катталган. Инди океанынын сууларында күчү 8,9 баллга чыгып көп өтпөй 7,3 балл көрсөткүч менен түндүк-чыгышта катталган. Ошол эле убактагы бир сааттын ичинде, болжол менен 6 баллга жеткен жер титирөөлөрдүн сериясы Суматра аралынан толкундар менен Индиянын Андаман аралдарына карай жылып кеткен. Бул зилзала цунамиге алып келип, Индиянын, Индонезиянын (негизинен Ачех провинциясында) жана Шри-Ланканын жээктеринде жайгашкан калктуу конуштардын эң чоң кыйрышына түрткү болгон.
Өлгөндөрдүн саны кеминде 225 000, ал эми Индонезиянын өзүндө 166 300 адам, анын ичинде курорттордо жүргөн туристтер каза болгон. Курман болгондордун жалпы саны 2,2 миллионго жакын адамды түзүп, 1 миллион адам үй-жайсыз калган.



















