Президент Режеп Тайып Эрдоган Түркиянын коргоо өнөр жайындагы чоң жетишкендикти жарыялап, өлкөнүн ата мекендик өндүрүшү болгон 48 даана KAAN аскердик учагы Индонезияга экспорттоло турганын билдирди.
Бул тууралуу ал өзүнүн социалдык тармактагы баракчасында билдиргенин Anadolu агенттиги жазды.
Белгиленгендей, ал өлкөнүн рекорддук экспорт келишимине салым кошкон уюмдарды куттуктады.
“Дос жана боордош Индонезия менен кол койгон келишимдин алкагында Түркияда 48 KAAN (ата мекендик аскердик учак) чыгарылып, Индонезияга экспорттолот”, – деди түрк лидери.
Ошол эле учурда ата мекендик жана улуттук коргоо өнөр жайынын жетишкендиктерин жана учурдагы мүмкүнчүлүктөрүн чагылдырган бул келишим Түркия менен Индонезия үчүн пайдалуу болот деген ишенимин билдирди. Мындан тышкары келишимдин ишке ашуусунда маанилүү роль ойногон Индонезиянын президенти Прабово Субиантого ыраазычылык айтты.
Келишимге кол коюу аземи Индонезиянын президенти, Түркиянын Коргоо өнөр жай башкармалыгынын башкы директору Халюк Гёргюн жана эки өлкөнүн башка жогорку даражалуу жетекчилеринин катышуусунда өттү.

Келишимде учактарды жакынкы аралыкта жеткирүү каралган. Ал эми келишимдин жалпы суммасы 10 млрд. АКШ долларын түзөт.
TUSAŞтын башкы директору Мехмет Демироглу кол коюуну тарыхый этап деп атады.
“Кечээ биз башкалар белгилеген маршруттар боюнча жүрдүк. Бүгүн биз өзүбүз жолдорду ачып, горизонтторду аныктап жатабыз. KAANдын көтөрүлүшү Түркиянын глобалдык көз карашынын, өзүнө болгон ишенимин жана инженердик кубаттуулугунун өсүшү”,- деди Мехмет Демироглу.
KAAN – түрк аэрокосмостук корпорациясы (TUSAŞ) тарабынан иштелип чыккан бешинчи муундагы аскердик учак.
Бул учактын долбоору 2016-жылы башталган. Прототиби 2023-жылдын мартында чыгарылган.
Учак 2024-жылдын 21-февралында алгачкы учуусун жасап, түрк авиациясынын тарыхында жаңы доорду ачкан.
Түркия бул типтеги учактарды чыгаруучу технологияга ээ саналуу өлкөлөрдүн бири.
Бешинчи муундагы учак катары классификацияланган KAAN аскердик учагы, радардан качуу өзгөчөлүктөрүнө ээ. Ар бири 13 000 килограмм тартуу күчүн камсыз кылган кош кыймылдаткыч менен иштейт. Бул өзгөчөлүктөрдүн негизинде учак 1,8 Mach ылдамдыгына жете алат.
TUSAŞ ошондой эле жасалма интеллект, өнүккөн сенсор системалары жана учкучсуз учуучу аппараттар менен иштөө жөндөмүн бириктире турган алтынчы муундагы моделдин үстүндө ишин улантууда.


















