Бүгүн, 25-сентябрда Жогорку Кеңеш өзүн-өзү тараткан чечим кабыл алды. Ал эми 23-сентябрдагы жыйынында Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти боюнча комитеттин VII чакырылыштагы Кыргызстандын Парламентинин өзүн-өзү таркатуусу боюнча сунушту караган болчу.
Аталган маселе боюнча депутат Улан Пиримов маалымат берди. Ал демилгелүү топто 32 депутат бар экендигин белгилеп, сунушту киргизүүнүн жагдайларына токтолгон.
“Эки негизги окуя – президенттик жана парламенттик шайлоонун аралыгы жакын болуп калат. Андыктан саясий туруктуулукту бекемдөө жана мамлекетте бийлик бутактарынын толук кандуу иштеп туруусун камсыз кылуу максатында демилгечи топ VII чакырылыштагы Жогорку Кеңештин депутаттары өзүн-өзү таркатуусу боюнча сунушту киргиздик”, – деди Улан Пиримов.
Жогорку Кеңештин VII чакырылышынын өзүн-өзү таркатуусун демилгелеген депутаттар; Н. Азыгалиев, Н. Сыдыгалиев, М. Маматалиев, Ж. Садырбаева, К. Сулайманов, А. Исраилов, Т. Масабиров, У. Пиримов, А.Турсунбаев, Д. Төлөнов, А. Козубаев, А. Кенжебаев, Г. Жунушалиева, Н. Алимжанова, С. Зулпуев, Л. Лаурова, Ч. Султанбекова, Б. Түлөбаев, Р. Рыспаев, К. Самаков, Ж. Акаев, Р. Жакышов, С. Өмүрзаков, Ж.Нышанов, Г. Молдобекова, М. Мураталиев, А. Эгембердиев, А. Таштанбеков. А. Тыналиев. А. Малиев.
Өткөн жумада депутаттар кол чогулткандан кийин сунуш парламенттин төрагасы Нурланбек Тургунбек уулуна жөнөтүлүп, ал бул демилгени колдой тургандыгын билдирген.
Мыйзамга ылайык, өзүн-өзү таркатуу демилгеси жалпы депуттатардын үчтөн экиси колдоп, чечим кабыл алынгандан кийин мамлекет башчысы бир жума аралыгында Жогорку Кеңешке мөөнөтүнөн мурда шайлоо дайындайт.
Азырынча парламенттик шайлоо 30-ноябрда өтөрү айтылууда.
VII чакырылыштын депутаттары 2021-жылы шайланып келип, жалпы курамы 90ду түзгөн жана “Ата Журт Кыргызстан”, “Ишеним”, “Ынтымак”, “Альянс”, “Бүтүн Кыргызстан” жана “Ыйман Нуру” фракцияларынан турган. Мындан тышкары 36 бир мандаттуу окургдардан шайланып келген депутаттар бар.
Эскерте кетсек, буга чейин бул чакырылыштын депутаттарынын ичинен бир канчасы мандатынан ажыраган.
Алар: Орозайым Нарматова, Равшанбек Сабиров, Фарходбек Алимжанов, Фархат Исмаилов, Жаныбек Абиров, Өмүрбек Бакиров, Эмил Жамгырчиев, Бакыт Төрөбаев, Абдыбахаб Боронбаев, Искендер Матраимов, Нурлан Ражабалиев, Айбек Осмонов, Жусупбек Коргонбай уулу, Максатбек Сарбагышев, Адахан Мадумаров, Шайлообек Атазов, Мейкин Абдалиев, Нуржигит Кадырбеков, Султанбай Айжигитов жана Тазабек Икрамов.















