Өзбекстан менен Ооганстандын бийлиги Тути-Майдан газ кенин өздөштүрүү иштерине старт беришти. Аземге «Өзбекнефтегаз» компаниясынын башчысы жана энергетика министринин биринчи орун басары катышты. Долбоорду 25 жылдык мөөнөткө ишке ашыруу боюнча келишимге өзбекстандык Eriell KAM компаниясы кол койгон.
Ооганстанда өзбекстандык компаниянын катышуусунда газ кенин өздөштүрүү иштери башталды. Бул тууралуу Ооганстандын экономика маселелери боюнча премьер-министрдин милдетин аткаруучунун орун басары Абдул Гани Барадар Ахунддун басма сөз кызматы билдирди.
Кеп өлкөнүн түндүгүндөгү Жаузжан жана Фарьяб провинцияларында жайгашкан Тути-Майдан кениндеги газды чалгындоо жана казып алуу долбоору тууралуу болууда.
TOLO News Ооганстандын Тоо-кен өнөр жайы жана мунай министрлигине таянып, 25 жылдык келишим эл аралык KAM Group жана өзбекстандык Railcom компаниялары менен түзүлгөнүн жазды. Кыязы, KAM Groupтун өнөктөшү катары мурда Өзбекстан өкүлдөрү атаган Eriell компаниясы чыгууда. Барадардын сөз сүйлөгөн видеосунда Eriell KAM логотибин да көрүүгө болот.
14-сентябрда Балх провинциясында өткөн иш-чарага Абдул Гани Барадар, Өзбекстандын энергетика министринин биринчи орун басары Бахтиёр Маматкаримов, Узбекнефтегаз компаниясынын төрагасы Баходиржон Сидиков, Өзбекстандын президентинин Ооганстан боюнча атайын өкүлү Исматулла Иргашев жана башкалар катышты.

Барадар мындай ири долбоордун ишке ашырылышы Ооганстандын инвестицияларга даяр экенин көрсөткөнүн белгиледи.
Анын айтымында, бул долбоор өлкөнүн газ жана электр энергиясын импорттоого болгон көз карандылыгын азайтып, чет өлкөлүк валютанын чыгышын кыскартат жана келечекте газды экспорттоого негиз түзөт.
Тоо-кен өнөр жайы жана мунай министринин милдетин аткаруучу Хидаятулла Бадри Өзбекстан менен түзүлгөн акыркы келишимдер эки өлкөнүн экономикалык кызматташуусун бекемдей турганын айтты.
Исматулла Иргашев Өзбекстандын Ооганстандагы ири экономикалык долбоорлорду колдоого даяр экенин ырастады.
Ооганстандын Тоо-кен өнөр жайы жана мунай министрлигинин маалыматына ылайык, Тути-Майдан кени 7500 чарчы чакырым аймакты ээлейт. Бул жерде 30га жакын скважина бургуланган жана жаратылыш газынын олуттуу коруна ээ.
Долбоор тууралуу
Өткөн жылдын октябрында Исматулла Иргашев Eriell KAM компаниясы Ооганстандагы газ кенин өздөштүрүү боюнча келишим түзгөнүн билдирген. Анын айтымында, Өзбекстан 25 жыл бою жыл сайын 100 млн доллар инвестиция салат жана өндүрүлгөн газды кайра иштетет.
Хидаятулла Бадри алгачкы эки жылда казылган газ 100 МВт электр энергиясын өндүрүүгө пайдаланыларын белгилеген.
Иргашевдин маалыматы боюнча, Тути-Майдан газ кору 3 трлн кубометр деп бааланууда. Долбоорду өзбек-ооган биргелешкен Eriell KAM компаниясы ишке ашырат.
Анын айтымында, инженерлер 8 эски скважинанын ишин калыбына келтирүүнү изилдеп жатышат. Алгачкы эки жылда бир нече миллиард кубометр газ өндүрүү пландалууда. Келишимге ылайык, Өзбекстан жыл сайын 100 млн доллардан инвестиция салып, 10 жыл ичинде жалпы инвестиция көлөмүн 1 млрд долларга жеткирет.
Eriell KAM тууралуу
Eriell KAM компаниясы 2024-жылдын 13-октябрында Сурхандарья облусунун Термез районунда — Ооганстан менен чек арага жакын аймакта катталган. Негизги ишмердиги — жаратылыш газын казып алуу. Уставдык капиталы 12 млрд сумду түзөт.
Компаниянын жетекчиси Нодиржон Насимжонович Бобоев, ал эми жалгыз негиздөөчүсү — Eriell Group Entities. Бул компания өз кезегинде Eriell Managment (50%) жана Kam Energy Int (50%) компанияларына таандык.
Kam Energy Int ооган ишкери Замари Камгарга таандык. Ал Kam Group холдингинин негиздөөчүсү жана ээси. Холдингдин курамына Kam Air авиакомпаниясы, Kam Energy энергетикалык компаниясы, UzAf Trade Company, Eagle Trading & Logistics, Kam Construction, Kamgar Gold, Royal Eagle Petrol, Kam Oil жана башка ишканалар кирет.
Ал эми Eriell Managment компаниясы Нодиржон Бобоевге (51%) жана Ходзидакис Николай Василиске (49%) таандык.
Өзбекстанда мунай-газ тармагында Eriell бренди менен 2004-жылы негизделген компаниялар тобу иш алып барат. Алар мунай-газ тармагындагы ишканалар үчүн скважиналарды куруу жана капиталдык оңдоо кызматтарын көрсөтөт. Eriell Groupтун башкармалыгынын төрагасы жана бенефициары катары ишкер Бахтиёр Фазылов көрсөтүлгөн.


















