Президент Шавкат Мирзиёев Абдулла Ариповду “уюштуруучулук потенциалы чоң, билими жана аткаруу бийлиги системасында иштөө тажрыйбасы бар, жоопкерчиликти ар дайым терең сезген жетекчи”,- деп баалады.
Президент Шавкат Мирзиёевдин катышуусунда Олий Мажлистин Мыйзам чыгаруу палатасынын жыйыны өттү.
Президент өз сөзүндө Жаңы Өзбекстан жаңы парламент менен бирге өзүнүн өнүгүүсүнүн чечүүчү этабына кирип жатканын белгиледи. Жаңы доордо кечээки талаптар, критерийлер менен иштөө мүмкүн эместиги белгиленет. Ошондуктан өкмөт өз ишин таптакыр жаңы негизде уюштурушу керек, ал үчүн күчтүү премьер-министр керек.
Мамлекет башчысы Өзбекстан Республикасынын Премьер-министринин кызмат ордуна Абдулла Нигматович Ариповдун талапкерлигин көрсөтүү жөнүндө атайылап чечим кабыл алды.
Абдулла Арипов жогорку уюштуруучулук дарамети, билими жана аткаруу бийлиги системасында иштөө тажрыйбасы бар жетекчи, ар дайым жоопкерчиликти терең сезе билген жетекчи экени айтылды.
Талапкер бүгүнкү күндө өкмөттүн алдында турган орчундуу милдеттерди чечүүдө министрлер кабинетинин ишмердүүлүгүн натыйжалуу уюштура аларына, өкмөт мүчөлөрүнүн, министрликтердин жана ведомстволордун жетекчилеринин башын бириктирип, аларды ишке ашырууга мобилизациялай аларына ишеним билдирилди.
Президент Абдулла Ариповдун талапкерлигин депутаттардын талкуусуна алып чыкты.
Арипов министрлер кабинетинин жакынкы жана узак мөөнөттүү иш-аракеттеринин программасы менен тааныштырды. Депутаттар жана фракция лидерлери талапкер жана программасы боюнча өз ойлорун айтышты.
Талапкердин жана өкмөттүн программасы каралып, премьер-министрдин талапкерлигин жактыруу маселеси добушка коюлду.
Депутаттар жашыруун добуш берүү менен Өзбекстан Республикасынын Премьер-министри кызматына Абдулла Ариповду бекитти.
Эскерте кетсек, 63 жаштагы саясатчы Өзбекстандын өкмөтүн 2016-жылдын 13-сентябрынан бери үзгүлтүксүз жетектеп келет.


















