Кытайдын төрагасы Си Цзиньпин Пекинде иш сапары менен жүргөн Россиянын Мамлекеттик Думасынын төрагасы Вячеслав Володинди кабыл алды.
Бул тууралуу МамДуманын расмий сайтында жарыяланды.
Володин Си Цзиньпинге Россиянын президенти Владимир Путин жолдогон саламын жана жакшы каалоолорун айткан.
“Мамлекеттик Думанын төрагасы бүгүн Пекинде өткөн Россия Федерациясынын Федералдык Жыйыны менен Кытайдын Эл өкүлдөрүнүн Бүткүл кытайлык жыйынынын ортосундагы кызматташтык боюнча парламенттер аралык комиссиянын онунчу отуруму тууралуу да маалымат берди”,- деп айтылат маалыматта.
Кытайлык маалымат каражаттарынын жазганына караганда, Володин жетектеген россиялык парламенттик делегациянын иш сапары Кытай Эл өкүлдөрүнүн Бүткүл кытайлык жыйынынын Туруктуу комитетинин төрагасы Чжао Лэцзинин чакыруусу менен башталган. Тараптардын жолугушуусунда парламенттер аралык өз ара аракеттенүүнү өнүктүрүү жана экономика менен коопсуздуктан тарта туризм, илим, билим жана маданиятка чейин түрдүү тармактарда кызматташууну бекемдөө маселелери тууралуу сөз болгон.
Эксперттердин айтымында, бул сапар орус-кытай өнөктөштүгүнүн жогорку деңгээлин ырастоо жана парламенттик деңгээлде диалогду мындан ары кеңейтүүгө даярдыгын көрсөтүү максатын көздөйт.


















