Россиянын президенти Владимир Путин 2026-жылдын 19-20-майында өтө турган Бээжинге расмий сапарынын алдында Кытай элине видео кайрылуу жасады. Бул маалыматты Kremlin.ru жарыялады.
Кайрылуунун негизги пункттарында – визасыз режимди киргизүү, каржылык көз карандысыздык жана дүйнөлүк өнөктөштүккө көңүл бурулуп, эки өлкө глобалдык коопсуздук үчүн иш алып барары баса белгиленди.
Президент бул кайрылуусунда, эки өлкөнүн өкүлдөрүнүн ортосундагы үзгүлтүксүз өз ара сапарлардын маанисин белгилеп, Москва менен Бээжиндин ортосундагы достук жана кызматташтык келишимине кол коюлганынын 25 жылдыгын эске салды.
“Үзгүлтүксүз сапар алмашуулар жана жогорку деңгээлдеги орус-кытай сүйлөшүүлөрү эки өлкөбүздүн ортосундагы мамилелердин толук спектрин өнүктүрүү жана алардын чындап эле чексиз мүмкүнчүлүктөрүн ачуу боюнча биргелешкен аракеттерибиздин маанилүү жана ажырагыс бөлүгү болуп саналат”, – деп айтылат кайрылууда.
Путиндин айтымында, бүгүнкү күндө орус-кытай мамилелери чындап эле болуп көрбөгөндөй деңгээлге жетти. Алардын өзгөчө мүнөзү өз ара түшүнүшүү жана ишеним атмосферасында, өз ара пайдалуу жана тең укуктуу негизде кызматташууга, урмат-сый диалог жүргүзүүгө жана эки өлкөнүн негизги кызыкчылыктарына, анын ичинде эгемендүүлүктү жана улуттук биримдикти коргоого тиешелүү маселелер боюнча бири-бирин колдоого даярдыкта көрүнөт.
Ал мындан тышкары, эки өлкө келечекке ишенимдүү карап, саясат, экономика жана коргонуу жаатындагы байланыштарды активдүү өнүктүрүп, гуманитардык алмашууларды кеңейтип, эл аралык байланыштарды кубаттап жатышкандыгын кошумчалады. Ошондой эле бул маселелер Пекинде боло турган сүйлөшүүлөрдүн күн тартибинде экендигин баса белгиледи.
“Мен Си Цзиньпиндин Россия менен узак мөөнөттүү кызматташууга болгон берилгендигин чын жүрөктөн жогору баалайм. Биздин жакшы жана достук байланыштарыбыз келечек үчүн эң амбициялуу пландарды түзүүгө жана аларды ишке ашырууга жардам берет деп ишенем”,- деди Путин.
Ал белгилегендей, орус-кытай соодасы өсүүнү улантып, 200 миллиард доллардан ашып кеткен жана мунун дээрлик бардык өз ара эсептешүүлөрү рубль жана юань менен жүргүзүлөт.
“Биз өлкөлөрүбүздүн ортосунда өз ара визасыз режимдин киргизилишин кубаттайбыз. Бул бизнес жана туризм алмашуусуна гана өбөлгө түзбөстөн, орус жана кытай жарандарынын ортосундагы байланыш жана тармакташуу үчүн жаңы мүмкүнчүлүктөрдү ачат”, – деди Россиянын лидери.
Путин белгилегендей, Россия-Кытай стратегиялык тыгыз союзу дүйнөлүк аренада маанилүү, турукташтыруучу ролду ойнойт. Ошол эле учурда алар эч кимге каршы саясат жүргүзбөйт, тескерисинче тынчтык жана жалпы гүлдөп-өнүгүү үчүн иштейт.


















