25-июлда Восточный космодромунан учурула турган россиялык ракета-алып жүрүүчү “Союз-2.1б” Ирандын спутнигин орбитага чыгарат.
Бул тууралуу Tasnim агенттиги билдирди.
“Иран жума күнү өзүнүн спутнигин россиялык “Союз” ракета-алып жүрүүчү менен учурат. “Союз” ракета-алып жүрүүчү 2025-жылдын 25-июлунда, жума күнү Россиянын “Восточный” космодромунан космоско учурулат. Учуруу Иран убактысы боюнча саат 09:54тө ишке ашат. Ракетада эки негизги спутник Ионосфера-М” №3 жана №4 жана башка 18 чакан спутник болот”, – деп айтылат маалыматта.
Ракетанын корпусуна Ирандын космостук агенттигинин жана Ирандын космостук изилдөө борборунун логотиби түшүрүлгөн.
22-июлда Роскосмос “Союз-2.1б” ракета алып жүрүүчү “Ионосфера-М” №3 жана №4 гелиогеофизикалык спутниктери, ошондой эле 18 аппарат “Восточный” космодромундагы 1С старттык аянтчага орнотулганын маалымдаган. Ракетаны учуруу 25-июлда Москва убактысы боюнча 08 саат 54 минутага белгиленген.
Иран бир нече жолу орус космодромдорунан спутниктерди учурган. 2022-жылы Ирандын өтүнүчү менен Байконурдан “Хайям” спутниги орбитага чыгарылган.
Ислам Республикасы өзүнүн космостук программасын 2004-жылы баштаган жана 1959-жылы түзүлгөн БУУнун космос мейкиндигин тынчтык максаттарында пайдалануу боюнча комитетинин негиздөөчү 24 өлкөнүн бири болуп саналат.


















