Бүгүн Тышкы иштер министринин орун басары Алмаз Имангазиев Кыргызстандагы Россиянын жаңы дайындалган элчиси Сергей Вакунов менен жолугуп, мигарциялык бир катар маселелерге талкууланганын мекеменин басма сөз кызматы билдирди.
Маалыматка караганда, жолугушуунун жүрүшүндө Кыргызстан менен Россиянын ортосундагы стратегиялык өнөктөштүктүн жана союздаштыктын эки тараптуу байланыштары, мекемелер аралык кызматташтыкты бекемдөө зарылдыгы белгиленген.
Имангазиев кыргызстандыктардын Орусиянын аймагына кирүүсүндө көйгөй жаралып жатканын жана эл аралык аэропорттордо текшерүүлөрдүн узакка созулуп жатышына тынчсызданганын билдирген.
ТИМ билдиргендей, Орусиянын Кыргызстандагы элчиси Вакунов эки тараптуу мамиленин күн тартибиндеги бардык маселелер боюнча иштешүүгө даяр экенин белгилеп, анын ичинде эки өлкөнүн компетенттүү укук коргоо органдарынын мамлекеттер аралык, ведомстволор аралык өз ара аракеттенүүсүнүн алкагында мындан аркы иштерди жүргүзүү боюнча макулдашууга жетишкендиги белгиленген.
Эскерте кетсек, буга чейин Россиянын Мамдумасында бир катар миграциялык мыйзамдарга өзгөртүүлөрдү киргизүү боюнча маселелер көтөрүлгөн. Буга Москва облусундагы Красногорск шаарында “Крокус Сити Холл” концерттик залында жасалган терракт да түздөн-түз таасирин тийгизген.
Белгилей кетүүчү жагдай, учурда Россияда бир миллионго жакын кыргызстандык эмгек мигранттары иштешет.



















