Кыргызстандын премьер-министри Адылбек Касымалиев Россия Федерациясына болгон жумушчу сапарынын биринчи күнүндө Екатеринбургда Россиянын премьер-министри Михаил Мишустин менен жолугушту.
Министрлер кабинетинин басма сөз кызматы жарыялаган маалыматка караганда, тараптар ар кандай тармактардагы эки тараптуу кызматташтыктын актуалдуу маселелерин талкуулашкан.
Төрага бир катар сүйлөшүүлөрдү жүргүзгөндөн тышкары, “Иннопром” эл аралык өнөр жай көргөзмөсүнө барат жана иш-чаранын пленардык жыйынында сөз сүйлөйт.
Ал катышкан көргөзмөдө металлургия, өндүрүш технологиялары, санариптик технологиялар, машина куроо жана өнөр жайды автоматташтыруу тармактарында иштеген компаниялар көрсөтүлөт.
Ал эми interfax.ru жарыялаган маалыматта, Мишустин эки тараптуу мамилелердин туруктуу өнүгүп жаткандыгын жана эки өлкөнүн президенттери дайым байланышта экендигин баса белгилеген.
“Бүгүн биз өз ара күн тартибибиздеги бардык маселелерди талкуулайбыз, ал эми эртең биз ошондой эле кыргыз компаниялары да катыша турган ири “Иннопром” көргөзмөсүнө катышабыз”, – деди Россиянын премьер-министри.

















