Ош шаарынын мэриясы 3833 бак-даракты кыюуну пландап жатат. Бул тууралуу чечимди мэрдин орун басары Сонунбек Жунусбаев шаардык кеңештин 31-январдагы сессиясына алып чыгып, депутаттардын колдоп берүүсүн суранды.
Анын айтымында, экологдордон тартып, токой чарбасы сыяктуу мамлекеттик органдардын өкүлдөрү менен сүйлөшүүлөрдү жүргүзүшкөн. Пландалган дарактар шаардын Курманжан датка (1870 дарак), Ленин (1870), А.Масалиев (453) жана Асранкулов (38) көчөлөрүндө кыйылуусу күтүлүүдө. Булардын ордуна клен, акация, чынар терек сыктуу 4 миңден ашык дарак отургузуу пландалган.
“Дарактарды кыюу менен жолдорду кеңейтип, ирригациялык арыктарды куруп, лотокторду орнотобуз. Келечекте электр чубалгылары алынып, жер астынан өткөрүү иштери аткарылат”,-деди Жунусбаев.
Сессиянын жүрүшүндө депутат Айгүл Салиева мэриянын бул багыттагы ишин сынга алып, шаарга отургузулган дарактардын канча пайызы көктөөрүн сурады. Буга жооп берген Жунусбаев, калаага жылына 1200дөн 1400гө чейин дарак отургузуларын, бирок анын 20 пайызы көктөбөй каларын билдирди.
“2018-жылы шаарга 5 миң түп дарак отургуздук дешкен, бирок депутаттар комиссия түзүп текшеришсе, ошончо сандагы дарак чыкпай калган. Азыр 4-5 миң дарак эгебиз деп жатасыңар, алардын миңи гана көктөп, калганы көктөбөй калса жоопкерчиликти ким алат?”,-деди Салиева.
Аны менен катар ал дарактар көктөбөй калса, депутаттар күнөөлүү болуп калбаш керектигин эскертти.
Сессиядагы талкуулар менен сунуштардан кийин “Ош шаарынын айрым көчөлөрүндөгү бак-дарактарды кыюуга уруксат берүү жөнүндө” маселени Ош шаардык кеңеши колдоду.
Эске сала кетсек, буга чейин мэрия шаардын Курманжан датка көчөсүнөн 2 миңден ашык көп жылдык дарактарды алып салууну демилгелеп чыккан.



















