Мьянманын аскердик бийлиги массалык амнистия жарыялап, анын алкагында өлкөнүн мурдагы президенти Вин Мьин да кечирилип, бошотулду. Ал 2021-жылдагы аскердик төңкөрүштөн бери камакта болчу.
Бул чечим тууралуу ушул айдын башында парламентте (аскерлер көзөмөлдөгөн) добуш берүү аркылуу расмий түрдө мамлекет башчысы болуп дайындалган Мин Аун Хлайндын администрациясы билдирди.
Мин Аун Хлайн 2021-жылдагы төңкөрүштүн натыйжасында бийликке келип, ошондон бери өлкөнүн саясий системасын иш жүзүндө көзөмөлдөп келет. Анын президент болуп шайланышы аскерлердин бийлигин бекемдеди. Ошол эле учурда шайлоо процесси БУУ жана Батыш өлкөлөрү тарабынан сынга алынган.
Мин Аун Хлайн Түштүк-Чыгыш Азиядагы Москвага эң жакын лидерлердин бири катары эсептелет. Төңкөрүштөн кийин Россия менен кызматташтык күчөдү: Москва Мьянмага курал-жарак жеткирүүчү негизги өлкөлөрдүн бири бойдон калууда, тараптар аскердик багытта, анын ичинде окутуу жаатында да активдүү иштешет.
Мьянма Украинага каршы толук масштабдуу басып кирүү башталгандан кийин Москванын аракеттерин колдогон. Ал Россиянын саясатын ачык жактаган аз сандагы өлкөлөрдүн бири болуп калды. The Insider басылмасы жазгандай, Мьянманын хунтасы Россияга курал-жарак жана техника үчүн тетиктерди берип келет. Украинанын чалгын кызматынын маалыматына караганда, Россия Мьянмадан ок-дарыларды да сатып алган, кийин алар орус аскерлеринин позицияларынан табылган.


















