28-октябрда Ямайканы “Мелисса” бороону каптады. Натыйжада электр энергиясы массалык түрдө өчүп, үч адамдын өмүрү кыйылды. Шамал менен коштолгон катуу бороон имараттарды кыйратып, шаарларды суу алдында калтырды. Толкундардын бийиктиги төрт метрге чейин жетип, жээк боюндагы турак үйлөрдү уруп өткөн. Шамалдын ылдамдыгы саатына 295 километрге чейин катталды.
Ямайканын бийлиги жана калкы бул бороон тууралуу алдын ала эскертүү алышкандыктан, айрым даярдык көрүүгө үлгүрүшкөн. Бирок зыяндын көлөмүн азырынча так аныктоо мүмкүн эмес дешет расмий адамдар. Анткени көптөгөн шаарлар учурда дээрлик толугу менен суу алдында калган, ошондой эле өлкөдө болжол менен 25 миңдей турист кыйын абалда калышкан.
Учурда Ямайка “кырсык зонасы” деп жарыяланды. 15 миңдей адам убактылуу баш калка жайларга жайгаштырылды, дагы 530 миң тургун электр жарыгысыз калууда. Премьер-министр Эндрю Холнесс билдиргендей, ал жерде 5-категориядагы бороон-чапкынга туруштук бере турган эч кандай инфраструктура болгон эмес. Азыркы тапта бул бороон аралды капатган акыркы 174 жылдагы эң кубаттуу табигый кырсык деп аталды.
Ямайка бийлиги АКШдан жардам сурап кайрылып, АКШ президенти Дональд Трамп жардам көрсөтө турганын ырастады. Ал мындай күчтүү табигый кубулушту биринчи жолу көрүп жатканын белгиледи.
“Мелисса” тарыхтагы эң күчтүү бороондордун бири болуп калышы мүмкүе экени айтылууда — айрым маалыматтар боюнча, ал 2005-жылы 1 392 адамдын өмүрүн алган “Катрин” циклонунан да ашып түшкөн болушу мүмкүн.
Циклон башка өлкөлөргө да таасирин тийгизди. Доминикан Республикасында бороондон улам 1,2 миллион адам таза суусуз калган.
Азыр “Мелисса” Кубага карай жылууда. Өлкө бийлиги эвакуация иштерин баштап, 735 миңден ашуун адам коопсуз аймактарга чыгарылганын президент Мигель Диас-Канель билдирди.
“Провинциялар менен байланышып, “Мелисса” ураганына байланыштуу көрүлгөн чараларды тактадык. 735 миңден ашык жаран эвакуацияланды, иштер дагы деле уланууда. Кубада алдыдагы түн абдан оор болот”, — деп жазды ал Х социалдык тармактагы баракчасында.
АКШнын бороон-чапкынды аныктоо боюнча Улуттук борборунун (NHC) маалыматына караганда, “Мелисса” мурда үчүнчү категорияга чейин басаңдаган, бирок Кубага жакындаганда кайра күчөп, төртүнчү категорияга жеткен. Кийинчерээк NHC билдиргендей, бороон Кубанын чыгышындагы Сантьяго-де-Куба провинциясын каптаган. Бул учурда шамалдын максималдуу ылдамдыгы саатына 195 километрге жеткен.



















