Мароккодо 9-сентябрга караган түнү болгон катуу жер титирөөдөн набыт кеткендердин саны 2000ден ашып, үч күндүк улуттук аза күтүү жарыяланды.
Зилзаладан 2012 адам көз жумуп, 2060ы жаракат алды. Алардын ичинен 1404 адамдын абалы оор экенин өлкөнүн мамлекеттик телеканалы Ички иштер министрлигине таянып билдирди.
Марракеш шаарындагы 6,8 баллдык зилзаладан турак жайлар, имараттар, мечиттер кыйрады. Үй-жайсыз калгандар ачык асман алдында түнөдү. Урандылардын арасында калгандарды издөө уланууда.
Дүйнөлүк саламатык сактоо уюму силкинүүнүн кесепетинен 300 миңден ашуун жабыркаганын маалымдады.
Азык-түлүк саткан дүкөндөрдө узун кезек пайда болгону, тамак-аш таңкыс экени кабарланды. Урандылар көчөлөрдү тосуп калгандыктан, коңшу айылдарга өтүү мүмкүн эмес.
Касабланка, Рабат жана башка аймактарда адамдар үй-жайларын таштап кетишүүдө.
Аскерлер да куткаруучулар менен чогуу жабыркаган аймактарга чатырларды, жууркан-төшөк, суу, тамак-аш жана башка буюмдарды жеткирүүгө көмөктөшүүдө.
Быйыл февралда катуу силкинүүдө 50 миңден ашуун адамын жоготкон Түркия Мароккого жардам берип жатат. 2021-жылы Батыш Сахарадагы жаңжалдан улам Марокко менен карым-катышын үзгөн Алжир аба мейкиндигин гуманитардык жана медициналык учактар үчүн ачарын билдирди.
