Венесуэланын Мамлекет башчысы Кариб деңиз аймагында тынчтык маселелери боюнча эл аралык конференция чакырууну сунуштады.
Венесуэла акыркы беш жумада АКШнын агрессиясына кабылып жатат деп билдирди Боливар Республикасынын президенти Николас Мадуро пресс-конференцияда. Бул жыйынды Venezolana de Televisión телеканалы түз алып көрсөттү.
“Беш жума бою бизге 1200 ракетасы бар эсминецтер жана атомдук суу астында жүрүүчү кайык менен коркутуп келишти”, — деди ал.
Президент белгилегендей, “Венесуэла өзүнүн мыйзамдуу коргонуу укугун толук көлөмдө ишке ашырып жатат”, анткени Кариб деңизинде республиканын жээктеринде сегиз кеме жана АКШнын атомдук суу астында жүрүүчү кайыгы жайгашкан. Ошондуктан мамлекет башчысы Кариб деңизинин аймагында тынчтык маселелери боюнча эл аралык конференция өткөрүүнү сунуштады.
Мадуро АКШнын Аскер-деңиз күчтөрү Венесуэланын балык уулоочу кемесин өлкөнүн өзгөчө экономикалык аймагында сегиз саат кармап турганын айыптады. “Бул АКШнын деңиз пехотасынын кол салуу аракети эл аралык коомчулук үчүн да, америкалык куралдуу күчтөрдүн намысы үчүн да уят нерсе”, — деп баса белгиледи ал.
Венесуэлалык лидер бардык байланыштар АКШ менен токтотулганын билдирди. Ал “АКШнын аскердик операциясынын максаты — Венесуэлада туруксуздукту жаратып, бийликти алмаштыруу жана өлкөнүн табигый ресурстарын, анын ичинде мунай, газ жана алтынды колго алуу” экенин айтты. Ошол эле учурда президент Венесуэла өзүнүн коргонуу жөндөмдүүлүгүн бекемдегенин жана “эч качан мунай колониясына айланбай турганын” белгиледи.
19-августта АКШнын аскер-деңиз күчтөрүнүн үч эсминецтери (USS Gravely, USS Jason Dunham жана USS Sampson) “наркокартелдерге каршы операцияларды жүргүзүү үчүн” Венесуэланын жээктерине, Кариб деңизинин түштүк бөлүгүнө жөнөтүлгөн. Ошондой эле атомдук суу астында жүрүүчү кайык USS Newport News, ракеталык крейсер USS Lake Erie, десанттык кемелер жана 4,5 миң аскер жөнөтүлгөнү кабарланган. Президент Николас Мадуро АКШнын аскер-деңиз күчтөрүнүн Венесуэланын жээктерине топтолушун республиканын акыркы 100 жылдагы эң чоң коркунучу деп эсептейт.


















