Беларусь президенти Александр Лукашенко Ирандын президенти Масуд Пезешкианды жана иран элин Ислам революциясынын 47 жылдыгы менен куттуктады.
Бул тууралуу Лукашенконун басма сөз кызматына таянып БЕЛТА жазды.
«Иран өзүнүн тарыхында бир нече жолу олуттуу сыноолордон өткөн. Жакындагы окуялар мамлекеттик бийлик институттарынын жетилгендигин жана коомдук келишимдин бекемдигин текшерген сыноо болду. Кыйын мезгилде конституциялык тартиптин сакталуусу жетекчиликтин жоопкерчилигин жана жарандардын тышкы күчтөрдүн таңуулоосуна жол бербей, өз тандоосун коргой билүү жөндөмүн көрсөтөт», — деп айтылат куттуктоодо.
Президент Тегерандын эл аралык аренадагы туруктуулугу урматтоого татыктуу экенин белгилеп, аймактагы чыңалуу жана катуу каршылашуу шартында да Иран өз жолу менен өнүгүп, салттуу руханий баалуулуктарга берилгендигин көрсөтүп жатканын баса белгиледи.
Лукашенко ошондой эле Масуд Пезешкиандын Беларуска жасаган сапарын жылуу маанайда эскерип, ал эки тараптуу мамилелерге жаңы дем бергенин айтты.
Беларусь президенти Иран президентинин чың ден соолукта болуп, ийгиликтерге жетишин, ал эми бул өлкөнүн жарандарына тынчтык жана бакубатчылык каалады.


















