8-майда Кремлде Россия Федерациясынын Президенти Владимир Путин Улуу Ата Мекендик согуштагы Жеңиштин 81 жылдыгына арналган салтанаттуу иш-чараларга катышуу үчүн Москвага келген Беларусь Республикасынын Президенти Александр Лукашенко менен жолугушту. Бул тууралуу Крмелдин маалымат кызматы билдирди.
В. Путин: Урматтуу Александр Григорьевич!
Сизди биздин жалпы, менимче элдерибиз үчүн эң башкы майрам — Улуу Ата Мекендик согуштагы Жеңиш күнүнүн алдында көрүп жатканыма абдан кубанычтамын. Бул — совет элинин ошол согуштагы жеңиши.
Беларусь — мурдагы Советтер Союзунун согуш учурунда эң көп жапа чеккен республикаларынын бири. Бүгүн Беларусь мамлекетинин башчысы биздин жаныбызда болуп, эртең Кызыл аянттагы салтанаттуу иш-чараларга биз менен бирге катышары символикалуу.
Бизде ар дайым талкуулай турган маселелер бар — экономикага, социалдык тармакка байланышкан маселелер. Тышкы кыйынчылыктарга карабастан, соода көлөмү рекорддук деңгээлге жетти. Жалпысынан абал жакшы.
Мен Сизге акыркы учурда Россиянын экономикасында болуп жаткан өзгөрүүлөр тууралуу айтып берем. Жакшы тенденциялар бар, алар биздин Евразия экономикалык бирлигиндеги өнөктөштөргө да, айрыкча Беларусь менен болгон мамилелерге да оң таасирин тийгизет. Анткени айрым багыттар боюнча биздин мамилелер андан да терең.
Александр Григорьевич, Сизди көргөнүмө абдан кубанычтамын. Кош келиңиз!
А. Лукашенко: Владимир Владимирович, биринчи кезекте чакырууга рахмат. Чынын айтсам, чакырбасаңыз да келмекмин — бул жакшы, жарык майрам.
Ар дайым ойлонобуз, эмне айтабыз деп. Айрыкча биздин «курч» журналисттер бар. Бирок бир ой мени дайыма тынчсыздандырат: айрым досторубуз, коңшуларыбыз — мурда бир мамлекетте жашаган элдер — бул майрамды таануудан баш тартып жатышат, айрыкча биздин коңшулар.
Эмне үчүн ушундай кылышат деп ойлойм. Бул биздин чоң жетишкендигибиз да. Биздин ата-бабалар «күрөң чумадан» (фашизмден) Европаны гана эмес, бүт дүйнөнү сактап калган. Эгер жеңилип калсак, эмне болмок — баары түшүнүктүү. Анда эмнеге биз муну унутушубуз керек?
Бул болгон нерсе — бул биздин улуу мурас. Бул россиялыктардын да, белорустардын да, Советтер Союзунун бардык республикаларынын мурасы. Бардыгы согушкан, бардыгы курман болгон.
Ошондуктан айрым «жолдоштордун» бул Жеңишти унутуп, барктабай жатканы өкүнүчтүү. Ал тургай ата-бабалары согушкан адамдардын өздөрү да түшүнүксүз мамиле кылууда.
Биз болсо бул Жеңишти эч кимге бере албайбыз. Бул биздин жетишкендик. Белорустар бул согушта ар бир үчүнчү адамынан айрылган. Мындай Жеңишти кандай Президент жокко чыгара алат? Эч ким. Ошондуктан дайыма чакырып турганыңыз үчүн Сизге ыраазымын.
Белорус эли бул улуу иш-чарага катышууда деп эсептеңиз. Илгери биздин ата-бабалар Кызыл аянттан түз эле фронтко жөнөшкөн. Мен буга сыймыктанам, Сиз да баалайсыз деп билем. Кийин бул жерге келүүнү каалагандар көбөйөт. Бүгүн болсо убакыт кимдин ким экенин көрсөттү.
КМШда, Евразия бирлигинде Россиянын соодасынын 60–65 пайызы Беларусь менен туура келет. Башкача айтканда, биз негизги өнөктөшпүз. Соода көлөмү 60 миллиард долларга жакындап калды. Албетте, маселелер болот, бирок олуттуу талаштар болгон эмес. Бир-эки маселени талкуулап, өкмөттөргө чечүүнү тапшырабыз.
Мен да бүгүн бир-эки маселени талкуулайбыз деп ойлодум. Калганы — биздин Улуу Жеңиш.
Чакырганыңыз үчүн рахмат.
В. Путин: Александр Григорьевич, биз эч кимди расмий чакырган жокпуз. Жөн гана келүүнү каалагандардын баарын көргөнгө кубанычта болобуз дедик. Азыркы шартта, коопсуздук маселелерин эске алганда, бул табигый көрүнүш.
Бул жерде болгонуңуз үчүн чоң рахмат.
