Кыргыз-тажик мамлекеттик чек арасын делимитациялоо жана демаркациялоо иштери жакынкы айларда жыйынтыкталат. Бул тууралуу кечээ тышкы иштер министри Жээнбек Кулубаев маалымат жыйынында билдирди.
Анын айтымына караганда, бүгүнкү күндө кыргыз-тажик мамлекеттик чек арасынын 90%ы такталды.
Министр белгилегендей, жумушчу топтор жума сайын жолугушууларды өткөрүп жатат. Өкмөттөр аралык комиссия бир жумада Кыргызстанда, кийинки жумада Тажикстанда жыйынга чогулушуп, бир катар жагдайлар боюнча макулдашуулар жүрүүдө.
Ж. Кулубаевдин сөзүнө таяна турган болсок, жакынкы айларда эки өлкөнүн чек ара маселеси чечилиши мүмкүн. Анткени министр журналисттердин суроолоруна жооп берип жатып, “Президент Садыр Нургожоевич жана Тажикстандын президенти Эмомали Рахмон мамлекеттик органдарга тапшырмаларды берген. Биз аны аткарганга аракет кылып жатабыз. Чек ара бир күндө эле чечилбейт. Сүйлөшүүлөрдүн негизинде эки тарапты канааттандыра турган чечимге келсек, кол койгонго мүмкүнчүлүк ачылат”,- деди.
Эскерте кетсек, такталбаган чек ара чырынан улам эки өлкөнүн жарандары тарабынан майда чыр-чатактар байма-бай катталып отуруп, 2021-2022-жылдары кыргыз-тажик элдеринин ортосунда масштабдуу кандуу кагылышуулар чыккан. Бул кагылышууларда эки тараптан тең жоготуулар болгон.



















