Ош облусунун Кара-Кулжа районундагы Кеңеш жана Кара-Гуз айыл өкмөттөрүндөгү элдин Ош шаарына каттаган жолу дээрлик 60 чакырымга кыскарды. Анткени аталган айыл өкмөттөн Ош-Бишкек жолундагы Мырза-Арык айылына кетчү жол (Ылай-Талаа – Мырза-Арык жолу) ачылды. Эми тургундар 22 чакырым жол жүрүп, мурдагы каттамдарына караганда, алтымыш чакырым жолду кыскартышат.
Бул тууралуу ЖК депутаты Эмил Токтошев билдирди.
Анын айтымында, аталган жолдун ачылышына жана анын оңдоп-түздөө иштерине жашоочулар өздөрү 1,5 млн сом жыйнаган.
“Элдин суранычы менен жол сүрүүчү техникалары менен камсыздап бердим. Техникалар 1 жума дегенде жолду тегиздеп, айрым бөлүктөрүнө шагыл жайды. Алдыда автоунаа жолунун 3 жерине көпүрө салуу зарылчылыгы турат. Кантсе да Кара-Кулжа эли алыс жолду жакын кылып ушул жол менен каттай баштады”,-деди депутат.

Кошумчалай кетсек, аталган эки айыл өкмөттүн эли Ош шаарына барып келүү үчүн Кара-Кулжа жана Өзгөн райондорунун административдик борборлору аркылуу дээрлик 120 чакырым жүрүп, айланып каттап жүрүшкөн.
Ылай-Талаа – Мырза-Арык жолу союз учурунда өзгөчө макамга ээ болчу. Асфальтталган жол көчкүнүн жана тынымсыз селдин кесепетинен каралбай калып, бузулуп кеткен. Айрым учурда демөөрчүлөрдүн жардамында ачылып, бирок сел келип, кайра эле жол жабылып турган.
Кошумчалай кетсек, аталган жол аркылуу аталган райондогу Алайкуу элинин Ош шаарына каттаган жолу дээрлик 30-40 чакырым кыскарды.



















