Бүгүн, 28-сентябрда Кыргызстандын социалдык тармактарында, айрым ММКларда мамлекеттик Тууну өзгөртүү маселеси кызуу талкууланды. Ага Жогорку Кеңештин сайтына мамлекеттик символдор жөнүндөгү мыйзамды өзгөртүү тууралуу долбоор коомдук талкууга коюлгандыгы себеп болду. Анын авторлору – парламент төрагасы Нурланбек Шакиев жана депутат Улан Примов.
Демилгечилердин айтымында, мыйзам долбоору өлкөнүн мамлекеттик башкы символдорунун бири болгон тууну жакшыртууга багытталып жатат.
Алардын пикиринде, азыр туунун ортосундагы түндүктүн жана тегерегиндеги күн нурларынын сүрөтү “күн караманы же боз үйдүн тышкы бетин элестеткен диллеманы пайда кылууда”.
“Ошондуктан күн нурунун толкун сымал формасын күндүн түз чагылдырган нурларынын формасына өзгөртүү сунушталат” деп белгилешти авторлор.
Мамлекетибиздин негизги символун өзгөртүү демилгесине коомдук ишмер Эмилбек Каптагаев Фейсбук аркылуу өз пикирин төмөндөгүдөй билдирди:
— Тууга, гербге, гимнге кашына берүүнүн себеби эмне? Такыр түшүнбөй койдум…
Туудагы нурларды толкун түрүндө эмес түз кылып коёлу дешеттер… Андан эмне өзгөрүп кетет? Болгону эртең дагы бирөө чыгат — туубуз циркулярканын араасы болуп калыптыр деп.
Негизи физиканы окуган ар бир окуучу билет, жарык нурунун табигаты толкун экендигин, жарык нуру түпө-түз эмес, ал толкун түрүндө…
Тууну, гербди, гимнди өзгөртө берүү алардын ЫЙЫКТЫГЫН жоготот, сыйын кетирет… Улам кийин келген бийлик өзүнүн табитине, түшүнүгүнө, маанайына жараша өзгөртө берүүсүнө жол ачат…
Башка эле маанилүү иштер менен алектенсек дурус го дейм…
Белгилей кетүүчү жагдай, Кыргызстандын мамлекеттик туусу өлкө эгемендик алгандан кийинки алгачкы парламентинин 1992-жылдын 3-мартындагы токтому менен бекитилген. 2004-жылдын 17-июлунда «Кыргыз Республикасынын мамлекеттик символдору жөнүндө» мыйзам кабыл алынган, анда 3-берене менен тууну сүрөттөө бөлүгү келтирилип, түстүү жана схематикалык чагылдырылышы тиркелген. Анда “Мамлекеттик туу ортосуна кырк нуру тегиз, түз чачыраган алтын түстөгү тегерек күн алкагынын, күн алкагынын ичине кыргыз боз үйүнүн кызыл түстөгү түндүгүнүн сүрөтү түшүрүлгөн тик бурч түрүндөгү кызыл түстөгү кездемеден жасалат. Туунун эни анын узундугунун бештен үчүн түзөт” деп жазылган.
