Иран Ислам Республикасынын Аскер-деңиз күчтөрүнүн арсеналы “Талайе” жана “Насир” аттуу канаттуу ракеталар жана биринчи жолу чалгындоо системалары жана радио электрондук согуш системалары менен жабдылган тик учак комплекстери менен толукталды.
Бул тууралуу Ирандын Аскер-деңиз күчтөрүнүн командачысы контр-адмирал Шахрам Ирани билдиргенин иран ЖМКлары жазды.
Анын айтымында, миң километрден ашык алыстыкка уча алган «акылдуу» Талайе ракеталык системасы учуп баратып жаңы буталарды аныктап, душмандын бутасына күтүүсүз сокку урат. Өз кезегинде, 100 километрден ашык алыстыкта учуучу “акылдуу” деңиз канаттуу “Насир” ракетасы бутаны жок кылуу менен байланышкан операцияларда абдан чоң мүмкүнчүлүктөргө ээ.
Командирдин айтымында, ошондой эле өлкөнүн аскер-деңиз флотунун курамына биринчи жолу радио электрондук согуш жана чалгындоо системалары менен жабдылган тик учак комплекстери, ошондой эле порттук жана якордук буксир да кошулду.
Ал бүгүн көрсөтүлгөн аскердик техникалардын бардыгы өлкөнүн коргонуу өнөр жайында ирандык адистер тарабынан иштелип чыкканын кошумчалады.
Эске салсак, буга чейин Ирандын коргоо өнөр жайынын адистери гиперүндүү ракетаны жасоо технологиясына ээ болушканын, ракета учурда сыноо баскычында экенин жар салышкан.
Андан мурда июнь айында Ирандын Ислам революциясынын сакчылар корпусунун аэрокосмостук күчтөрү ата мекендик өндүрүштөгү “Фаттах” деп аталган жаңы гиперүндүү ракетасын көрсөткөн. Жаңы ракета бардык ракетадан коргонуу системаларынан өтүп, аларды жок кылууга жөндөмдүү. Анын учуу аралыгы 1,4 миң чакырымды түзөт, ылдамдыгы саатына 14-15 миң чакырымга жетет. Ракета жогорку тактыгы жана маневрдуулугу менен айырмаланат, ал радиолокациялык системаларга көрүнбөйт.


















