Иран полициясынын башчысы жакында болгон массалык баш аламандыктардын артында тургандарга катуу эскертүү жасап, коопсуздук күчтөрү террордук ишмердүүлүккө тиешеси бар «акыркы адам» кармалганга чейин операцияларын улантарын билдирди.
Тартипсиздиктерге арналган кеңири брифингдин жүрүшүндө генерал Ахмадреза Радан коомчулукту коопсуздук органдарынын сергектигине ишендирип, негизги лидерлердин көбү жана чет өлкөлөр менен байланышкан куралчан топтордун мүчөлөрү буга чейин эле кармалганын белгиледи.
Анын айтымында, баш аламандыктар маалында кармалган айрым адамдар чет элдик атайын кызматтар менен түздөн-түз байланышта болгон, алардан АКШ долларындагы ири суммадагы акчалар табылган жана шаарлардагы абалды туруксуздаштыруу боюнча атайын даярдыктан өтүшкөн.
«Биз зордук-зомбулуктун көрүнүштөрүн инсценировкалоого үйрөтүлгөн адамдарды кармадык, — деди Радан. — Аларга полиция тарабынан жарадар болгондой түр көрсөтүп, коомдук пикирди манипуляциялоо буйругу берилген».
Ал душмандардын бул кутумунун ишке ашпай калышын иран элинин сергектиги менен түшүндүрүп, коомчулук башаламандыктардын зомбулук мүнөзүн түшүнгөндөн кийин эл алардан алыстаганын билдирди.
«Акыркы күндөрү башаламандыктардын катышуучулары колдоосуз калышты», — деп кошумчалады ал. Полиция башчысынын айтымында, бул коопсуздук күчтөрүнө чечкиндүү чараларды көрүүгө мүмкүнчүлүк берди.
Радан андан ары камоолордун көпчүлүгү жарандардын полициянын “түз байланышына” чалган коңгуроолорунун негизинде ишке ашкан.
Максималдуу сабырдуулук
Радан баш аламандыктар учурунда жарандык инфраструктурага каршы мурда болуп көрбөгөндөй зордук-зомбулук жасалганын, анын ичинде мечиттерге, жеке үйлөргө жана коомдук объекттерге кол салуулар болгонун билдирди. Анын айтымында, мындай ыкмалар максималдуу башаламандык жаратууга багытталган.
Коопсуздук күчтөрүнүн аракеттери тууралуу сөз кылып жатып, ал башаламандыктардын алгачкы күндөрүндө полиция тынч нааразычылык билдиргендерди уюшкан тартип бузуучулардан айырмалоо үчүн «максималдуу сабырдуулук» көрсөткөнүн баса белгиледи.
«Биздин чыдамдуулук чегибиз атайын жогору коюлган», — деди ал. Анын айтымында, башаламандыктардын уюштуруучулары өкмөттү “адам өлтүргүч” катары көрсөтүү үчүн курмандыктарды пайда кылууга аракеттенишкен.
Ошондой эле ал эл арасындагы куралчан адамдардын тынч жарандарга жана полиция бөлүмдөрүнө ок атып, мамлекеттик зомбулуктун элесин жаратууга аракет кылган тактикасын сүрөттөдү.
Радан коопсуздук күчтөрү күнөөсүз адамдарга коркунуч жаратышы мүмкүн болгон өлүмгө алып келүүчү күчтү колдонгондун ордуна, «өз ыктыяры менен өлтүрүлүү же жарадар болуу коркунучуна барышканын» айтты.
Бейшемби жана жума күндөрү болгон башаламандыктар учурунда коопсуздук күчтөрүнүн ондогон кызматкерлери курман болгон.
Дүйшөмбү күнү Ирандын борбордук бөлүгүндөгү Исфахан шаарында коопсуздук күчтөрүнүн 30 кызматкери менен коштошуу зыйнаты өттү.

















