Жалал-Абад шаарынын 2024-жылга бюджети 1 млрд сом деп бекитилүү алдында турат.
Бул тууралуу Жалал-Абад шаарынын мэри Эрнисбек Ормоков өткөн жылы жергиликтүү жана республикалык бюджеттен, инвесторлор тарабынан жасалган жумуштар, калктын социалдык-экономикалык көйгөйлөрүн чечүү багытында жүргүзүлгөн иш-аракеттер боюнча элге отчёт берүү учурунда билдирди.
Шаар мэри 2024-жылы жергиликтүү жана республикалык бюджеттен, облустук өнүктүрүү фонду тарабынан аткарыла турчу жумуштар боюнча маалымат берип, жыйын суроо-жооп иретинде уланды.
2023-жылы Жалал-Абад шаарынын бюджети 819,4 млн сомду түзгөн.
Былтыр реформалардын алкагында Жалал-Абад шаарын экинчи экономикалык борборго айлантуу үчүн 13 ири долбоордун планы бекитилип, ага 2 миллиард сом бөлүнгөн. Андан сырткары, шаардын башкы планы өзгөрүп, аймагы кеңейтилери, калаанын аймагында жайгашкан түрмө менен аэропорт сыртка чыгарылып, ордуна жаңы имараттар салынарын пландалган.



















