Украинанын президенти Владимир Зеленский британиялык журналист Стивен Бартлеттке берген маегинде АКШнын президенти Дональд Трампты кайрадан сынга алды.
Зеленскийдин айтымында, Трамп бардык көйгөйлөр үчүн Орусиянын президенти Владимир Путинди эмес, аны күнөөлөп, америкалык тарапташтарына АКШдагы дизель майынын баасы Украинадан улам өсүп жатканын түшүндүрүүгө аракет кылууда.
«Менин оюмча, Трамптын мени Орусиянын агрессиясына жана Орусия жасаган кылмыштарга күнөөлөшү туура эмес жана кабыл алынгыс. Ал окуялардын контекстин өзгөртүп жатат, бул адилетсиздик. Менимче, бул жөн гана Ирандагы жана Жакынкы Чыгыштагы окуялардан көңүлдү башка жакка буруу аракети. Ормуз кысыгы бөгөттөлгөн. Маселенин түпкү себеби ушунда. Бирок бардык күнөө бизге оодарылып, өлкөбүздүн лидери катары мен чабуулдардын бутасына айланып жатам», — деди Зеленский.
Ал Трамп Путинге карата да өзүнө карата колдонгонундай катуу тон менен сүйлөшү керектигин белгиледи.
Зеленский АКШ президентинин Орусияга каршы «тозоктук санкциялар» киргизүү тууралуу сөздөрүнө да токтолду.
«Трамп муну жасай алат. Эмне үчүн андай кылбай жатканын билбейм», — деди Украина президенти.
Трамптын компромисске баруу тууралуу чакырыктарына комментарий берип жатып, Зеленский ок атышууну токтотуу жана сүйлөшүүлөрдү баштоонун өзү эле чоң компромисс экенин айтты.
«Трамп биз компромисске барышыбыз керек дегенде, мага ишениңиздер, ок атышууну токтотуу жана сүйлөшүүлөрдү баштоо — бул чоң компромисс», — деди ал.
Басылмалардын маалыматына ылайык, Трамп компромисс дегенде Орусиянын бир катар шарттарын аткарууну түшүнүшү мүмкүн. Алардын катарында украин аскерлерин Донбасстан чыгаруу же Орусия басып алган аймактарды анын карамагында деп таануу маселелери бар.
Зеленский ошондой эле Трампты президент катары дипломатиялык мамиле кылууга чакырды.
«Сиз президент болушуңуз керек. Сабырдуу болуп, дипломатиялык жол менен аракеттенишиңиз зарыл. Бирок жөн гана: “Кечирип коюңуздар, бул Путин, чоң өлкө. Анда баарын унутуп, кечирип, анан газды, дизелди же башка нерселерди сатып алып-сата берели”, — деп айта албайсыз», — деп белгиледи Украина лидери.
Мындан тышкары, Зеленский Украинага абадан коргонуу үчүн кармоочу ракеталарды жеткирүү боюнча келишим бар экенин билдирди. Анын айтымында, бул курал-жарактардын акысын Европа төлөп жатканына карабастан, АКШ аларды Украинага эмес, Жакынкы Чыгышка жөнөтүп жатат.















