Шавкат Мирзиёев 18-19-апрель күндөрү Тажикстанга расмий иш сапар менен барары пландаштырылууда. Бул тууралуу Өзбекстандын Тажикстандагы элчилиги билдирди.
Алдын ала маалымат боюнча, иш сапардын жүрүшүндө эки өлкөнүн ортосундагы кызматташтыкты жана достук мамилелерди чыңдоо маселелерин талкуулоо күтүлүүдө.
Маалымат булагы башка билидрүү жасаган эмес.
Элчилик мындан тышкары өзбек лидеринин иш сапарынын алкагында 17-20-апрель күндөрү Өзбекстандын Тажикстандагы Маданият күндөрү өткөрүлөрүн белгиледи.
Белгилей кетүүчү жагдай, кечээ Тажикстандын ТИМ башчысы Сирожиддин Мухриддин “Борбор Азия – Булуңдагы араб мамлекеттеринин кызматташтык кеңеши” Стратегиялык диалогунун Ташкентте өткөн тышкы иштер министрлеринин экинчи жолугушуусунда Өзбекстандын тышкы иштер министри Бахтиёр Саидов менен маектешкен.
Жолугушуунун жүрүшүндө тараптар эки тараптуу мамилелердин азыркы абалы менен келечегин жана эл аралык, аймактык уюмдардын алкагындагы кызматташтыкты талкуулашкан.
Тараптар ошондой эле Өзбекстандын президентинин Тажикстанга мамлекеттик иш сапарына даярдык иштерине байланышкан маселелерди талкуулашкандыгын Тажикстандын ТИМи маалымдап, бирок Мирзиёевдин ТРна качан келеринин так күнүн атаган эмес.



















