Президент Жо Байдендин администрациясы Өзбекстандан АКШга адам ташууга аракеттенген аткезчи топтун бетин ачканын, кеминде бир мүчөсүнүн чет өлкөлүк террордук уюм менен байланышы бар экени аныкталганын билдирди.
Ошол эле маалда Улуттук коопсуздук кеңешинин өкүлү Эдриен Уотсон белгилегендей, америкалык расмий адамдар аткезчилердин каналын пайдаланган өзбекстандыктар теракт пландаган же террористтер менен байланышта болгон деп эсептебейт.
Шейшембиде жарыяланган билдирүүдө топтун мүчөлөрүнүн биринин байланышы болгон делген түзүмдүн кайсы террордук уюм экени айтылган жок. Атын атабаган америкалык расмий адамдардын бири кеп «Ислам мамлекети» радикал уюму жөнүндө болуп жатканын «Ассошейтед Пресс» агенттигинин кабарчысына билдирди. Ал иликтөө тууралуу маалымат берүүдөн баш тарткан.
Улуттук коопсуздук кеңешинин билдирүүсүнө ылайык, Вашингтон аткезчи түйүндүн негизги мүчөлөрүн колго түшүрүү, мыйзамсыз жолдорду бөгөттөө, АКШга кирүү үчүн алардын кызматынан пайдаланган кишилерди аныктоо үчүн башка мамлекеттер менен кызматташууда.
Ишти иликтеп жаткан Федералдык иликтөө бюросу (FBI) да мигранттарга байланыштуу теракт коркунучу аныкталбаганын белгиледи.
Аткезчилер тууралуу биринчилерден болуп кабар тараткан CNN телеканалы ал түйүн аркылуу борбор азиялык ондогон жаран АКШга киргенин маалымдады.
«Ассошейтед Пресс» агенттигинин жазганына караганда, жылдар бою Кошмо Штаттарда иш табуу максатында өлкөгө мыйзамсыз жол менен кирүүгө негизинен мексикалык эркек кишилер аракеттенчү, бирок акыркы жылдары башка жерлерден да мигранттар агылууда.
Буга чейин Өзбекстандын укук коргоо органдары мекендештерин Мексика аркылуу АКШга жөнөтүүнү убада кылган бир нече жаран кармалганын билдирген.
Ал мыйзамсыз жол менен АКШга кирүүгө аракеттенгендердин арасында Кыргызстандын жарандары да бар.
