Өзбекстанда 500 миң гектардан ашык жерди чегиртке басып, аймактарды адистер дарылап жатышат.
Зыянкечтердин эң көп таралышы Каракалпакстанда, ошондой эле Хорезм, Бухара, Навои, Сырдарья жана Ташкент облустарында катталган.
Маалыматты Өзбекстандын Айыл чарба министрлигинин алдындагы карантин жана өсүмдүктөрдү коргоо агенттигинин билдирүүсүнө таянып podrobno.uz агенттиги жазды.
“19-июнга карата адистер 875 миң гектардан ашуун аянтты карап чыгышып, 507 миң гектардан ашуун жерде химиялык тазалоо иштери жүргүзүлдү. Кашкадарыя, Сурхандарья, Самарканд, Жиззак, Анжиян, Наманган жана Фергана облустарында чегирткелердин очогу толугу менен жок кылынды”, – деп айтылат маалыматта.
Агенттиктин билдирүүсүнө караганда, зыянкечтерге каршы күрөшүү күнү-түнү жүргүзүлүүдө. Атайын дары чачуу иштери эртең менен жана кечинде аткарылып, күндүз талаада байкоо жүргүзүлүп жатат.
Буга чейин социалдык тармактарда Зарафшанга чегирткелердин массалык басып киргенин көрсөткөн видео пайда болгон.
Эскерте кетсек, буга чейин Астанада Кыргызстан, Өзбекстан жана Казакстан өлкөлөрү Өсүмдүктөрдү коргоо боюнча Европа жана Жер Ортолук деңиз уюмунун (EPPO) жумушчу тобунун 55-жыйынынын алкагында жолугушуп, чегирткеге каршы күрөшүү чаралары боюнча сүйлөшүшкөн.
Жыйынтыгында тараптар кызматташтыкты бекемдөө, эл аралык фитосанитардык стандарттарды киргизүү жана маалымат алмашууну өнүктүрүү боюнча макулдашышкан.
Ошондой эле чек ара аймактарында биргелешкен аракеттерге, фитосанитардык абал, мониторингдин жыйынтыгы, зыянкечтердин таралышы жана көрүлгөн чаралар боюнча ыкчам маалымат алмашууларга көңүл бурушкан.



















