Греция, Италия жана Мексика дүйнөдөгү эң даамдуу ашканалары бар өлкөлөр катары таанылды. Ал эми Өзбекстан 2024-жылы акыркы орундарда болгонуна карабастан, 2025-жылдагы рейтингге такыр кирбей калган.
Жаңыртылган рейтингди World Population Review жарыялаган. Ага ылайык, Греция кайрадан дүйнөдөгү эң даамдуу ашканасы бар өлкө деп табылды.
Алдыңкы ондук дээрлик өзгөрүүсүз калган. Анын курамына Грециядан тышкары Италия, Мексика, Түркия, Испания, Португалия, Индонезия, Франция, Жапония жана Кытай кирген. Бул өлкөлөрдүн ашканалары 2025-жылы эң жогорку бааларга ээ болгон.
Рейтинг боюнча эң даамсыз ашканалар Никарагуа, Лаос жана Боливияда деп табылып, акыркы үч орунду ээлешкен.
Жалпысынан тизмеде 99 өлкө камтылган. Россия 34-орунду ээлеп, КМШ өлкөлөрүнүн көбүн артта калтырган. Андан алдыда болгону Грузия (30-орун) жайгашкан. Украина 43-орунда, Беларусь 75-орунда, Литва 39-орунда, Латвия 78-орунда, Азербайжан 56-орунда жайгашкан.
Ал эми Армения жана Казакстан ашканалары эң төмөн бааланып, 92 жана 93-орундарды ээлешкен. 2024-жылы Өзбекстан, Кыргызстан жана Молдова дагы төмөн орундарды ээлешкен болсо, 2025-жылы бул өлкөлөр рейтингден толугу менен чыгып калышкан.
Белгиленгендей, рейтинг болжол менен 400 миң жеке пикирдин негизинде түзүлгөн, бирок «эң даамдуу ашкана» түшүнүгү ар дайым субъективдүү бойдон калат.
Айрымдар мындай баалоо добуш бергендер Өзбекстандын ашканасын чындап татып көрбөгөн болушу мүмкүн деген божомолду айтышат.


















