Украинанын президенти Владимир Зеленский менен АКШнын президентинин элчилери Стив Уиткофф жана Жаред Кушнердин Берлиндеги канцлерликте сүйлөшүүлөрү аяктады. Пикир алмашуу беш саатка созулган жана сүйлөшүү бүгүн, 15-декабрда кайра улантылат.
Бул тууралуу Зеленскийдин кеңешчиси Дмитрий Литвин билдиргенин РБК басылмасы жазды.
“Буга чейин Германиянын канцлери Фридрих Мерц Зеленскийди Берлинде кабыл алган. Ал америкалык делегация менен сүйлөшүүлөрду жүргүзүү үчүн Германиянын борборуна келген. Украинанын лидерин Вашингтондун өкүлдөрү, анын ичинде Жаред Кушнер жана атайын элчи Стив Уиткофф Федералдык канцлердин кеңсесинде тосуп алган”,-деп билдирген Дмитрий Литвин.
Буга чейин Зеленский Берлинде украин, америкалык жана европалык өкүлдөрдүн катышуусундагы бир катар жолугушуулар өтөөрүн жарыялаган.
“Эң негизгиси, мен президент Трамптын өкүлдөрү менен жолугам. Ошондой эле, биздин европалык өнөктөштөрүбүз, көптөгөн лидерлер менен тынчтыкты орнотуу – согушту токтотуунун саясий чечими боюнча жолугушуулар болот”, – деп билдирген ал.
Reuters агенттигинин маалыматы боюнча, Украинанын президенти тынчтык сунуштарында компромисстер камтыларын журналисттердин суроолоруна жооп берип жатып билдирген.
Маалыматка караганда, Владимир Зеленский согуш тилкесиндеги аракеттерди токтотууну “адилеттүү вариант” деп атап, АКШ делегациясы менен сүйлөшүүлөр “тынчтыктын пайдубалына” жана Украинадагы тынчтыкты орнотууга багытталарын билдирген.
Ал эми Германия өкмөтүнүн өкүлү Стефан Корнелиус Берлиндеги сүйлөшүүлөр экономикалык маселелерге жана “Украинадагы тынчтык сүйлөшүүлөрүнүн абалы боюнча пикир алмашууга” багытталарын жарыялаган.


















