Иран Ислам революциясынын сакчылар корпусу аскердик кемелердин Ормуз кысыгына жакындашына катуу жооп кайтарыларын убада кылганын Press TV телеканалы маалымдады.
“Ормуз кысыгына ар бир согуштук кеменин жакындашы катаал жоопко туш болот”, – деп айтылат билдирүүдө.
Ирандын Жогорку лидеринин улук аскердик кеңешчиси Мохсен Резаи да АКШнын Ормуз кысыгын жабуу аракеттери “ийгиликсиз аяктарын” жана Тегеран мындай кадамга жол бербей турганын билдирди.
Резаи Ирандын куралдуу күчтөрү “АКШнын мындай кадамына жол бербей” турганын, анткени армиянын ар кандай коркунучтарга каршы туруу үчүн “олуттуу пайдаланылбаган мүмкүнчүлүктөрү” бар экенин кошумчалады.
Трамптын Ормуз кысыгын тосуу тууралуу билдирүүсү
Бүгүн эртең менен АКШ президенти Дональд Трамп Ормуз кысыгын тосуу башталганын жарыялады. Ал Ормуз кысыгы аркылуу өтүүгө аракет кылган бардык кемелерди тосуу бүгүн күчүнө кирерин TruthSocial социалдык медиа платформасында жазды.
Чаралар чыгыш убактысы боюнча саат 10:00дө (Москва убактысы боюнча саат 17:00) күчүнө кирет, деп айтылат Трамптын билдирүүсүндө. АКШ Ирандын портторуна кирип-чыгып жаткан бардык кемелерди тосот.
АКШнын Борбордук командачылыгынын маалыматы боюнча, америкалыктар ошондой эле Иранга Ормуз кысыгы аркылуу өтүү үчүн акча төлөгөн кемелерди көзөмөлдөп, кармашат.
АКШ президентинин бул пландары күн мурун 12-апрелде жарыяланды. Анда Трамп Ормуз кысыгын блокадалоого башка өлкөлөр да катышарын билдирген. Анын айтымында, бул чарага 11-апрелде Пакистанда өткөн Вашингтон менен Тегерандын ортосундагы сүйлөшүүлөрдүн ийгиликсиз болушу себеп болгон.
Ушул дем алыш күндөрү Пакистанда өткөн АКШ менен Ирандын сүйлөшүүлөрү жыйынтыксыз аяктады. Сүйлөшүүлөрдөн кийин Ирандын Тышкы иштер министрлигинин өкүлү Исмаил Багаи эки тарап бир нече маанилүү маселелер боюнча пикир келишпестиктерге туш болгонун билдирди. Ал сүйлөшүү ишенбөөчүлүк маанайында өткөнүн кошумчалаган.














