Казакстандын президенти Kaсым-Жомарт Toкаев бардык деңгээлдеги депутаттардын республикалык форумунда сүйлөп жатып, өлкө жарандары заман талабына жараша өзгөрүшү керек экенин билдирди. Бул тууралуу Aкорда маалымдады.
Президент өз сөзүндө коомдо биримдик, жоопкерчилик, сабырдуулук, өз ара колдоо жана ишеним барган сайын маанилүү баалуулуктарга айланып жатканын белгиледи.
Анын айтымында, айрыкча жаштар бул принциптердин өлкөнүн келечектеги өнүгүшү үчүн маанисин жакшы түшүнүп жатканы кубандырат.
Токаев жаш казакстандыктардын спортто, искусстводо, илимде, бизнесте жана технология тармагында жетишкен ийгиликтери коомчулук тарабынан жогору бааланып жатканын айтты.
Президент ошондой эле өлкөнүн:
- улуттук маданияты,
- технологиялык жетишкендиктери,
- коомдогу тилектештик мисалдары
Казакстанды дүйнөдө келечекке умтулган, өнүккөн жана цивилизациялуу мамлекет катары көрсөтүп жатканын белгиледи.
Токаев өкмөттүк жыйындарда жана жолдоолорду жарыялоодо мамлекеттик органдардын иши дайыма сынчыл талдоо менен караларын айтты. Бирок ошол эле учурда өлкөнүн айкын жетишкендиктерин да көрүү зарыл экенин белгиледи.
Президенттин айтымында, өлкө негизги багыттар боюнча өз потенциалын бекемдеп жатат. Азыркы негизги милдет — өнүгүүнүн темпин сактоо жана жаңы максаттарга жетүү.
Ал ошондой эле Казакстан эгемендүүлүк алгандан берки 35 жыл ичинде өлкө көптөгөн оң жана терс окуяларды баштан өткөргөнүн белгиледи. Бирок бул мезгилде казакстандыктар заманбап мамлекетте жашоонун тажрыйбасын топтой алышкан.
Сөзүнүн аягында Токаев дүйнө тез өзгөрүп жатканын айтып, мындай деди:
«Демек, биз – Казакстандын жарандары да өзгөрүшүбүз керек. Бул процесстин канчалык ийгиликтүү болушу элибиздин жыргалчылыгына түздөн-түз таасир этет».



















