Иранда он жылдан ашуун убакыттан бери бөгөттө турган YouTube платформасы эми Тегеран университетинин студенттери үчүн жеткиликтүү болгонун аталган окуу жайдын студенттик кеңеш билдиргенин Mehr News агенттиги жазды.
“Урматтуу студенттерибизге университеттин ички интернет тармагын колдонуу менен YouTube платформасына кирүү VPNсиз эле мүмкүн болуп калганын билдиребиз. Студенттер платформаны окуу жана изилдөө максатында пайдалана алышат”, — деп айтылат студенттик кеңештин Telegram каналында.
Бул жаңылык Иран бийлиги Telegram, YouTube, Instagram сыяктуу социалдык тармактарга жана интернет-платформаларга коюлган чектөөлөрдү жоюу мүмкүнчүлүгүн караштырып жатканы тууралуу маалыматтар фонунда чыкты. Ошондой эле өлкөдө X (мурунку Twitter) жана Facebook да азырынча бөгөттө бойдон калууда.
Буга чейин Иран парламентинин депутаты Мустафа Пурдехган Tabnak порталына берген маегинде, жакын арада бийлик Telegram’ды ачуу ниетинде экенин билдирген.
Mehr агенттигинин маалыматына караганда, иран өкмөтү Telegram’дын Иранда ишин жандандыруу үчүн бир катар талаптарды койгон.
Telegram 2018-жылдын апрелинде соттун чечими менен жабылган. Себеби — жарандардын арыздары жана колдонмонун иран мыйзамдарын сактабаганы көрсөтүлгөн.
Facebook жана X (Twitter) 2009-жылы, Instagram жана WhatsApp 2022-жылы жабылып, YouTube 2012-жылы чектелген. 2024-жылдын декабрында Иран бийлиги WhatsApp жана Google Play сервистерин кайра ачкан.
