Россия менен Иран каржылык билдирүүлөрдү өткөрүү тутумун бириктирди, эми өлкөлөрдүн банктары түздөн-түз операцияларды жүргүзө алышат.
Бул тууралуу Ирандын Борбордук банкынын жетекчисинин эл аралык иштер боюнча орун басары Мохсен Карими маалымат каражаттарына билдирди.
“Биз эки өлкөнүн (каржылык – ред.) билдирүүлөрдү өткөрүү тутумун бири-бири менен байланыштырдык. Бул эки өлкөнүн банктары үчүн бири-бири менен байланышуу үчүн Швейцариянын (SWIFT эл аралык төлөм системасынын борбору жайгашкан – ред.) кереги жок дегенди билдирет жана эки өлкөнүн коммерциялык банктары бири-бири менен ортомчулук мамилелерди түзө алышат. Экспорттоочу россиялык тарапка эсеп-фактурасын риал менен берип, Ирандагы орус банктарынан акча ала алат”, – деп Карими айтканын “Fars” агенттиги келтирет.
Ислам Республикасынын Борбордук банкынын жетекчисинин орун басары эки өлкөнүн экспортчулары операцияларды улуттук валюталар менен жүргүзө аларын кошумчалады.
Бир күн мурда Ирандын Улуттук өнүктүрүү фондунун аткаруучу кеңешинин мүчөсү Хоссейн Айвазлу Россия менен Ирандын улуттук жыргалчылык фонддору мунай-газ, мунай-химия, фармацевтика тармагында түрдүү долбоорлорду ишке ашыруу үчүн биргелешкен инвестициялык комитеттерди түзүүнү пландап жатканын билдирген.
Ирандын Борбордук банкынын башчысы Мохаммад Фарзин декабрь айынын аягында Иран менен Россиянын ортосунда рубль жана риал менен соода кылууга мүмкүндүк берүүчү валюталык келишимге 2024-жылдын биринчи чейрегинде кол коюла турганын билдирген. 2023-жылдын акыркы жумасында Фарзин Москвага эки күндүк иш сапары менен барып, Россия Банкынын жетекчиси Эльвира Набиуллина менен жолугушкан.
Белгилей кетсек, SWIFT — бул дүйнөдөгү бардык финансылык уюмдар жүргүзгөн операциялар тууралуу маалымат камтылган система. Европа биримдиги жакында андан Россиянын бир топ банктарын чыгарып салган. Иран системадан 2012-жылдын ноябрь айында ажыратылган. Бирок 2016-жылы Иран банктарына Евробиримдиктин санкциялык режими жарым-жартылай жоюлгандан кийин SWIFT системасына кайтуу мүмкүнчүлүгү берилип, кайра 2018-жылы чыгарылган. Мындай чечим АКШнын Ирандын өзөктүк келишиминен чыгышы жана Иранга каршы санкцияларын калыбына келтирүү фонунда кабыл алынган.


















