Афганистандагы талибдер өкмөтүнүн Тышкы иштер министрлиги Тажикстандын Хатлон облусунда үч кытайлык жумушчунун өлтүрүлүшүн айыптады. Бул тууралуу TOLO News басылмасы ТИМдин коомчулук менен байланыш бөлүмүнүн башчысы Зия Ахмад Такалге таянып билдирди.
Анын айтымында, кол салуу «региондогу өлкөлөрдүн ортосунда баш аламандык, туруксуздук жана ишенимсиздик жаратууну көздөгөн элементтер» тарабынан жасалган.
Министрлик Кытай жана Тажикстан элине көңүл айтты жана окуянын күнөөлүүлөрүн аныктоо үчүн бул өлкөлөрдүн бийликтери менен кызматташууга жана маалымат алмашууга даяр экенин билдирди.
Үч кытайлык жумушчунун өлтүрүлгөнү тууралуу 26-ноябрда Тажикстандын ТИМи билдирген. Каза тапкандар — «Шохин СМ» тоо-кен компаниясынын кызматкерлери. Окуя Тажикстандын Хатлон облусуна караштуу Шамсиддин Шохин районунда болгон. Кол салгандар Афганистандын аймагында туруп, ок атуучу курал жана гранаталар салынган дрон колдонушкан.
Ошол эле учурда афган басма сөзү афган-тажик чек арасыдагы жаңы окуя тууралуу кабарлады. Afghanistan International маалыматына караганда, 30-ноябрдын кечинде Тажикстанда жол курууда иштеген эки кытай жараны курман болгон. Кол салуу Афганистандын Бадахшан провинциясынын Маймай уездиндеги Разави айылынан жасалган — жумушчуларга ок атуучу куралдан ок атышкан. Маалымат булактарынын билдирүүсүнө ылайык, бул окуяга Маймайга башка райондордон келген талибдердин чек ара күчтөрү катышкандай көрүнөт.
Кытай менен Тажикстандын тышкы иштер министрликтери бул окуяны азырынча расмий комментарийлей элек.
Ал эми 1-декабрда Тажикстандын президенти Эмомали Рахмонго акыркы бир жума ичинде Афганистан менен чек арада эки жолу атышуу болуп, натыйжада беш адам өлүп, дагы бешөө жараат алганы тууралуу маалымат берилди.
Бул маалымат чек арадагы учурдагы кырдаалды жана аны коргоону күчөтүү жолдорун талкуулаган күч түзүмдөрүнүн жетекчилери менен болгон жумушчу жыйында айтылды.
Рахмон «Афганистан жарандарынын мыйзамсыз жана провокациялык аракеттерин катуу айыптап, тиешелүү органдарга маселени чечүү жана мындан аркы ушуга окшош жагымсыз окуяларды болтурбоо үчүн натыйжалуу чараларды көрүүнү» тапшырды, — деп жазат Тажикстан президенттик аппараты.



















