Тажикстандын президенти Эмлмали Рахмон 18-июнда Ирандын президенти Maсуд Пезешкиан менен телефон аркылуу сүйлөшүү жүргүздү. Анын жүрүшүндө Э. Рахмон Иран жетекчилигин жана элин Тегеран менен Вашингтондун ортосунда тынчтык келишимине жетишилгени менен куттуктады.
Тажик мамлекет башчысынын басма сөз кызматы билдиргендей, Эмомали Рахмон тараптар кол койгон документтин маанилүүлүгүн белгилеп, анын Жакынкы Чыгышта тынчтыкты жана туруктуулукту бекемдөөгө, ошондой эле туруктуу өнүгүүгө жана эл аралык коопсуздукка олуттуу салым кошо аларын айтты.
Тажикстандын президенти Иран элине тынчтык, туруктуулук жана бакубатчылык каалады.
Сүйлөшүүнүн жүрүшүндө тараптар тажик-иран кызматташтыгынын учурдагы абалын жана келечегин да талкуулашты. Эки өлкө тең эки тараптуу мамилелерди мындан ары кеңейтүүгө кызыкдар экенин ырастап, өз ара кызыкчылык жараткан жаңы биргелешкен долбоорлорду ишке ашырууга даяр экенин билдиришти.
Буга чейин, 18-июнда Эмомали Рахмон Иран менен АКШнын президенттерин тынчтык келишимине жетишкендиги менен куттуктап, аларга телеграмма жөнөткөн.
АКШ лидерине жолдогон кайрылуусунда ал жетишилген келишим Жакынкы Чыгышта тынчтыкты жана туруктуулукту бекемдөө үчүн чоң мааниге ээ экенин белгилеген.
Иран президентине жөнөткөн катында болсо келишимге жетишүү чоң аракеттерди талап кылганын жана анын натыйжасы Иран Ислам Республикасынын жетекчилигинин туруктуулугу менен саясий эркинин аркасында мүмкүн болгонун жазган.
Ошондой эле Эмомали Рахмон Катар мамлекетинин Эмири Шейх Тамим бин Хамад Аль Танинин дарегине да куттуктоо телеграммаларын жөнөткөн.
Мамлекет башчысы Катар менен Пакистан Иран менен АКШнын ортосундагы тынчтык макулдашуусуна жетишүүдөгү ортомчулук ролун жогору баалап, анын Жакынкы Чыгыштагы тынчтыкты жана туруктуулукту, ошондой эле эл аралык коопсуздукту бекемдөөдө маанилүү экенин белгилеген.
Дүйшөмбү күнү Иран менен АКШ өз ара түшүнүшүү жөнүндө меморандумга кол коюшкан. Документ аскердик аракеттерди токтотууну жана акыркы тынчтык келишимине жетишүү үчүн шарттарды түзүүнү карайт.

















