Түркмөнстан менен Иран көп жылдан бери жакшы коңшулук жана бир туугандык мамилелерди сактап келет.
Бул тууралуу Гурбангулы Бердымухамедов Иранга болгон сапарынын алкагында мамлекеттик IRIB телерадио компаниясынын кабарчысы Мохсен Хосейниге берген маегинде билдирди.
Бердымухамедов маегинде шейит Сейед Али Хаменеи менен көп жылдар бою болгон жолугушуулары тууралуу эскерип, Түркмөнстан менен Ирандын кызматташтыгына, ошондой эле өлкөнүн тынчтыкты жана жакшы коңшулукту көздөгөн саясатына токтолду.
Ал Түркмөнстан менен Иранды өз ара урматтоого жана тарыхый байланыштарга негизделген коңшу, бир тууган мамлекеттер деп атады. Анын айтымында, аятолла Сейед Али Хаменеи менен алгачкы жолугушуусу 1998-жылы болгон. Кийинки жылдары ар кандай мамлекеттик кызматтарды аркалап жүргөндө да Хаменеи менен бир нече жолу жолуккан.
Түркмөнстандын Халк Маслахатынын төрагасы бул жолугушуулар саясий, соода-экономикалык жана маданий-гуманитардык кызматташтыктын өнүгүшүнө чоң салым кошконун белгиледи. Анын айтымында, Хаменеи ар бир жолугушууда түркмөн жана иран элдеринин ортосундагы байланышты жогору баалап, мындай деп айтчу:
«Силер биз үчүн жөн гана коңшу эмессиңер, чыныгы бир туугансыңар».
Бердымухамедов эки өлкөнүн ортосундагы кызматташтык экономика менен гана чектелбестен, аймактагы жана дүйнөдөгү тынчтык менен туруктуулукту камсыздоо маселелерин да камтый турганын баса белгиледи.
Ал ошондой эле жолдорду жана көпүрөлөрдү куруу элдерди жакындаткан маанилүү иш экенин белгилеп:
«Түркмөнстан менен Иран биргелешип көптөгөн автомобиль жолдорун, темир жол тармактарын жана көпүрөлөрдү куруп ишке ашырышты», — деди.
Соода-экономикалык кызматташтык тууралуу сөз кылган Бердымухамедов эки өлкөнүн ортосунда газ түтүктөрү, электр берүү линиялары жана транспорттук инфраструктура объектилери курулганын айтты. Анын маалыматына ылайык, айрым жылдары эки мамлекеттин ортосундагы товар жүгүртүү 5 миллиард АКШ долларынан ашкан.
Ошондой эле ал узундугу 1500 чакырымдан ашкан мамлекеттик чек ара ар дайым достуктун жана бир туугандыктын символу катары каралып келгенин белгиледи.
Тарыхый жана маданий мурас тууралуу сөз кылган Бердымухамедов эки элдин окумуштууларынын, акындарынын жана жазуучуларынын байланышы кылымдардан бери уланып келерин айтты. Ошондой эле Гүлистан провинциясында үч миллиондон ашуун түркмөн жашай турганын белгиледи.
Анын айтымында, Иран жеринде коюлган түркмөн элинин улуу акыны жана ойчулу Махтымкули Фрагинин мурасы эки эл үчүн тең орток руханий байлык болуп саналат.
Дүйнөдөгү азыркы татаал кырдаалга токтолгон Бердымухамедов Түркмөнстан тынчтыкты жана гуманитардык баалуулуктарды бекем карманарын билдирди. Анын айтымында, өлкө «ачык эшик» саясатын жүргүзүп, эл аралык мамилелерде бейтараптуулук, тең укуктуулук жана өз ара урматтоо принциптерине таянат.
Бердымухамедов сөзүнүн соңунда мындай деди:
«Согушта жеңүүчү болбойт. Анткени атылган ок кимге тийерин тандабайт. Анын алдында бала турабы же жоокер турабы — ал үчүн эч кандай айырма жок».















