17-февралда Өзбекстандын президенти Шавкат Мирзиёев Кувейттин эмири шейх Мишаал аль-Сабахтын чакыруусу менен Кувейтке расмий сапар менен барды.
Мамлекет башчысын Кувейт эл аралык аэропортунан эмири шейх Мишаал ас-Сабах, мураскор ханзаада Шейх Сабах аль-Сабах жана башка расмий адамдар тосуп алышты. Мамлекет башчыларынын биринчи кыскача сүйлөшүүсү аэропортто эмирдин атайын терминалында болду.
Эми мамлекет башчылары жогорку деңгээлдеги сүйлөшүүлөрдү өткөрүшөт. Саммиттин күн тартибинде өзбек-кувейт достук жана көп кырдуу өнөктөштүк мамилелерин мындан ары тереңдетүү, саясий, соода-экономикалык, инвестициялык-финансылык жана маданий-гуманитардык чөйрөлөрдө кызматташууну кеңейтүү маселелери бар. Иш-чаранын жыйынтыгы боюнча бир катар өкмөттөр аралык жана ведомстволор аралык макулдашуулар кабыл алынары каралууда.
Сүйлөшүүлөрдүн жыйынтыгы менен биргелешкен документтердин жана макулдашуулардын пакети кабыл алынары күтүлүүдө.
Эске сала кетсек, 16-февралда Өзбекстандын президенти Шавкат Мирзиёевдин Кувейтке расмий сапарынын алдында аталган өлкөнүн борборунда өзбек-кувейт бизнес форуму өткөн.
Ага тиешелүү министрликтер менен ведомстволордун, тармактык ассоциациялардын жетекчилери, ошондой эле эки өлкөнүн 100дөн ашык ири компанияларынын жана каржы институттарынын жетекчилери катышкан.

Өзбекстандык делегацияны Инвестиция, өнөр жай жана соода министри Лазиз Кудратов жана Кувейттин делегациясын Соода-өнөр жай палатасынын жетекчиси Рабах аль-Рабах жетектеп барышкан.
Кувейттик ири компаниялар менен Өзбекстандын ортосунда саламаттыкты сактоо, айыл чарба, инфраструктура, мейманкана бизнеси, фармацевтика жана кыймылсыз мүлк тармагында долбоорлор ишке ашырылууда.
Белгиленгендей, 2024-жылы Өзбекстандын ИДПсы 6,5%га өсүп, 115 млрд долларды түзгөн. Ал эми чет элдик инвестициянын көлөмү 1,6 эсеге өсүп, 34,9 млрд долларга жеткен.
Кувейттин Соода-өнөр жай палатасынын башчысы Рабах аль-Рабах Өзбекстандын эки тараптуу өнөктөштүктү жандандыруу үчүн жагымдуу шарттарды түзүү аракетин жогору баалап, эки өлкөнүн ишкерлерин жигердүү кызматташууга чакырып, тараптардын жаңы долбоорлорду жана демилгелерди колдоого даярдыгын билдирген.



















