Владимир Путин ички рынокту күйүүчү май менен камсыздоо маселеси боюнча ири энергетикалык компаниялардын жетекчилеринин катышуусунда жыйын өткөрдү. Бул тууралуу Кремлдин басма сөз кызматы билдирди.
Россиянын президенти Владимир Путин өлкө аймагындагы май куюучу жайларда кезек бар экенин жана керектүү үлгүдөгү бензинди дайыма эле табуу мүмкүн эместигин моюнга алды.
Путиндин айтымында, учурда түзүлгөн кырдаалда эң ири мунайды кайра иштетүүчү заводдор толук кубаттуулукта иштеп жатат. Ошондой эле орто жана чакан ишканалар да ишке тартылып, пландуу оңдоо иштеринин мөөнөтү кыскартылган.
Президент июль айында күйүүчү майдын негизги түрлөрүнүн өндүрүшү июнь айындагы көрсөткүчтөн ашарын билдирди. Анын айтымында, учурда ички рынокко мурда топтолгон күйүүчү майдын запастары чыгарылган. Ошол эле учурда бензиндин запастары колдонулуп жатканына карабастан, алардын көлөмү өткөн жылдын ушул мезгилиндеги деңгээлге дээрлик барабар бойдон калганын белгиледи.
Путиндин маалыматына ылайык, учурда бензиндин запасы 1,7 миллион тоннаны түзөт, бул өткөн жылдын ушул мезгилине салыштырмалуу 4% аз.
Ошентсе да, Путин бензин тартыштыгы дагы эле сакталып жатканын белгиледи.
«Силер жакшы билесиңер, айдоочулар жана бизнес үчүн көйгөйлөр дагы эле бар. Тилекке каршы, май куюучу жайларда кезектер да бар. Мындан тышкары, керектүү үлгүдөгү бензинди азыр дайыма эле табууга мүмкүн болбой жатат», — деди ал.


















