Төлөйкөн ат майданындагы кечээ күнкү окуядан кийин Президентибиздин ушул сүрөтү фейсбукка кайра-кайра жарыяланып, “ажобузду ой басты…” деп кейигенсигендер көп болду. Мен да сүрөттү карап отуруп ошол мүнөттөрдө президент эмне жөнүндө ойлонупатты болду экен деген суроо койдум өзүмө. Бир кезде атактуу хирург Мамбет Мамакеев аксакал Жогорку Кеңештин трибунасынан: “Бул жигиттин көзү жөн көз эмес…” деп журналист Кабай Карабековго мүнөздөмө бергендей, ал күнү ажобуздун көз карашы жөн көз караш эмес экени даана байкалып турат. Ошондуктан адегенде балким, Садыр Нуркожоевич ал күнкү башаламандыктын келип чыгышына күнөөлүү ким болду экен деп башын катырып, кимдир бирөөлөргө жини келип тургандыр дейин десем, анын көзүнөн ачуулануунун, сурдануунун белгисин көрө алган жокмун.
Мен анын көзүнөн кабат-кабат өкүнүчтү көрдүм. Мага ал жакшы ниет, аруу максат менен тарыхый инсан Насирдин Исановдун 80 жылдыгын чогуу белгилөө үчүн өлкөбүздүн эң улуу, ыйык майрамы Эгемендик күнүн анын жердештери менен чогуу майрамдоо үчүн касиеттүү Ош жергесине атайын келгени ушундай окуя менен аяктап жатканына өкүнүп тургандай сезилди. Анан ким кандай ойлойт билбейм, мага жыл сайын белгиленип жүргөн Эгемендик күнүн чоң, маанилүү саясий, идеологиялык иш-чара, маани-маңызы өтө терең окуя катары уюштуруунун ордуна ага кезектеги той, шоу катары жеңил-желпи мамиле жасап, бул майрамдын беделин өтө төмөн түшүрүп койгон мамлекеттик катчы баш болгон өзүнүн командасынын бечелдигине көзү жетип, ичинен сызып тургандай көрүндү.
Бул эми менин жеке оюм, көз карашым. Бирок кандай болгон күндө да Төлөйкөндөгү окуя ажобузду, баарыбызды терең ойлонтту деп ишенем. Анткени, улуу орус ойчулу Лев Толстой айтмакчы, “Мысль – начало всего” – “Ой – бардыгынын башталышы”.
Мелис Айдаркулов.
(макала автордун Фейсбуктагы барагынан алынды)
