Президент Садыр Жапаров Кыргызстандын башкы прокурорлук кызматына Максат Асаналиевдин талапкерлигин сунуштады. Бул маалыматты президенттин басма сөз катчысы Аскат Алагөзов тастыктады.
Анын айтымында, сунуш Жогорку Кеңештин кароосуна жөнөтүлдү.
Белгилей кетсек, Максат Асаналиев учурда Ош облусунун прокурору кызматын ээлейт.
Эскерте кетсек, 3-июнда мурдагы башкы прокурор Курманкул Зулушев өз каалоосу менен отставкага кеткен.
Бирок ал эмне себептен кызматтан кеткендигин айткан эмес.
Ал эми бүгүн эле, 5-июнда Жогорку Кеңештин Конституциялык мыйзамдар, мамлекеттик түзүлүш, сот укук маселелери жана Жогорку Кеңештин Регламенти боюнча комитетинин кезексиз жыйынында башкы прокурорлукка мамлекет башчы тарабынан сунушталган Максат Асаналиевди дайындоого макулдук берүү жөнүндө маселе каралды.
Президенттин жана министрлер кабинетинин Жогорку Кеңештеги туруктуу өкүлү Алмасбек Абытов башкы прокурордун кызмат ордуна Максат Асаналиевди дайындоого макулдук берүү жөнүндө президенттин сунуштамасын тааныштырды.
Талкуунун жыйынтыгында комитет президенттин сунуштамасын Жогорку Кеңештин кароосуна жөнөттү.



















