Кыргызстандын Министрлер кабинетинин төрагасынын биринчи орун басары Данияр Амангелдиев Санкт-Петербург шаарына жумушчу сапарынын алкагында Петербург эл аралык экономикалык форумуна (ПЭЭФ-2025) катышууда.
Ал бул форумдун алкагында Кыргызстандын орусиялык өнөктөштөрү менен соода-экономикалык кызматташтыгын чыңдоого багытталган бир катар жолугушууларды өткөрүп, Алюминий Ассоциациясынын төрайымы Ирина Казовская, “РусАл”, “Росхим” компанияларынын жетекчилери, Якутиянын Башчысы Айсен Николаев менен жолугушту.
Мындан тышкары Орусия Федерациясынын өкмөтүнүн төрагасынын биринчи орун басары Денис Мантуров менен эки тараптуу сүйлөшүүлөр өттү.
Бул тууралуу министрлер кабинетинин басма сөз кызматы билдирди.
Данияр Амангелдиев алгачкы жолугушууларынын жүрүшүндөгү Алюминий Ассоциациясынын төрайымы Ирина Казовская менен алюминий тармагын өнүктүрүүнүн келечегине жана Кыргызстан менен ассоциациянын ортосундагы кызматташуу мүмкүнчүлүктөрүнө тиешелүү маселелерин талкуулап, жыйынтыгында жакынкы аралыкта эки тараптуу бизнес миссиясын өткөрүү боюнча макулдашууга жетишилди.
Ал эми “Росхим” компаниясынын жетекчилиги, мамлекеттик органдар менен өз ара аракеттенүү боюнча башкы директордун орун басары Марина Бортовая менен жолугушуусунда компаниянын Кыргызстандын аймагында химиялык долбоорлорду ишке ашырууга катышуу келечеги тууралуу сөз болду.
Амангелдиев Якутия башчысы Айсен Николаев менен жолуккан учурда эки тараптуу кызматташуунун кеңири чөйрөсүн талкуулашса, Орусия Федерациясынын өкмөтүнүн төрагасынын биринчи орун басары Денис Мантуров менен эки тараптуу кызматташууну талкуулашты.
Ошондой эле ушул эле форумдун алкагында Д. Амангелдиев Санкт-Петербургдун губернатору Александр Беглов менен да жолукту.

Мында 2025-жылдын мартында кыргыз-санкт-петербург өкмөттөр аралык комиссиясынын отурумунун жыйынтыгына токтолуп, аймактар аралык кызматташтыкты мындан ары чыңдоого, инвестиция тартууга жана биргелешкен долбоорлорду ишке ашырууга артыкчылык берүүгө кызыкдар экенин ырастады.
Жолугушуунун соңунда Данияр Амангелдиев кыргыз тарап биргелешкен демилгелерди ишке ашырууда ар тараптуу жардам көрсөтүүгө даяр экенин ырастап, Александр Бегловду өзүнө ыңгайлуу учурда Кыргызстанга сапар менен келип кетүүгө чакырды.
Эскерте кетсек, ушу тапта Санкт-Петербургда эл аралык экономикалык форуму өтүп жатат. Ага 140 өлкөдөн 20 миңге чукул өкүл катышууда. Алардын арасында ЕАЭБ, КМШ, БРИКС, АСЕАН уюмдарынын, Африка, Жакынкы Чыгыш жана Латын Америка континенттериндеги өлкөлөрдүн да делегациялары бар.
Санкт-Петербург эл аралык экономикалык форуму быйыл 28-ирет өтүүдө.
Бул иш чара 2006-жылдан бери Орусия Федерациясынын Президентинин колдоосу жана катышуусу менен өткөрүлүп келе жатат.



















