Ош шаарындагы 31 мектептин аянты жеке жактарга өтүп кыскарып кеткени буга чейин маалым болгон. Аларга кафе, айрымдарына үйлөр, дүкөндөр курулуп калганын калаанын вице-мэри Замир Юсупов айтып, учурда комиссия түзүлүп, иш жүрүп жатканын билдирди.
«Кадастр кызматы 31 мектептин аянттары боюнча иш алып барат. Ал эми Архитектура салынып калган имарттарга воттор берилгенби аныктап, жол картасын түзөт. Андан кийин биз прокуратура менен иш алып барабыз», -деди Юсупов.
Аянты кыскарып кеткен мектептердин тизмеси:
№ 4 С.М. Киров; № 10 В.И. Ленин; № 15 М. Курбанов; № 40 Королев; № 7 Нариман; № 24 М. Фрунзе; № 12 Н. Крупская; № 22 С. Шарипова; № 18 А. Навои; № 6 С. Макаренко; № 8 М. Горкий; № 19 Т.Г. Шевченко; № 39 70 лет Октября; № 47-мектеп; № 44-мектеп; № 51 Ж. Баласагын; № 54-мектеп; № 2 К. Маркс; № 5 Ж. Бөкөнбаев; № 3 В. Ломоносов; Олимп; № 29 М.И. Калинин; № 23 И.В. Панфилов; № 21 А.С. Пушкин; № 20 И. Раззаков; № 11 В. Терешкова; № 35 Ж. Атабаев; № 31 Курманжан Датка; № 9 Рудаки; № 41 Х. Абдуллаев; № 37 Г. Айтиев.
Маалымат кызматы аталган маселе боюнча 26-сентябрда укук коргоо органдарынын, муниципалдык ишканалардын, юристтердин катышуусунда жыйын өткөнүн билдирди. Анда мектептердин аянтын баштапкы калыбына келтирүү боюнча протоколдук тапшырмалар берилген. Ошондой укук коргоо органдарынан жана мекемелердин юристтеринен турган жумушчу топ түзүлгөн.
Мэриянын маалымат бөлүмүнүн жетекчиси Жумамидин Сулайманкулов билдиргендей, мектептердин аянтын жеке жактарга соода түйүндөрүн, турак жай жана коомдук жайларды салуу үчүн берүү фактылары 1991-2006-жылдар аралыгында эң көп катталган. Сулайманкулов булага кошумчалап, жакын аралыкта кайсы мектептин аянтына эмнелер курулганы тууралуу маалыматтарды жарыялай тургандыктарын айтты.
Кошумчалай кетсек, Ош шаарында жалпысынан 91 мектеп бар. Анын 55и мамлекетик калганы жеке менчик мектептер.
