Ош шаарында заманбап “Ош Сити” аталышындагы акылдуу шаарчанын курулушуна капсула салуу аземи болуп өттү. Бул долбоорду 5 жыл ичинде толук аяктоо пландалууда.
“Ош Сити” шаарчасында жалпысынан 12 миңден ашык батир курулуп, анын 1000и Мамлекеттик ипотекалык компанияга берилет. Турак жай комплексинин эң бийик имараты 24 кабаттуу болуп, заманбап шарттар түзүлөт.
Аталган акылдуу шаарчасынын курулушу Ош шаарынын 2025-жылга чейинки Башкы планынын алкагында ишке ашырылууда. Бул планда шаардын аймагын кеңейтүү, жаңы кичи райондорду жана өнөр жай-соода борборлорун куруу аркылуу калкты 1 миллион адамга жеткирүү максаты коюлган.
Долбоордун алкагында 500дөн ашык көп кабаттуу турак жайлар, мектептер, бала бакчалар, ооруканалар, соода борборлору, сейил бактар жана скверлердин курулушу каралган. Жалпысынан 250 миңдей адамды жайгаштыруу пландалууда. Долбоордун жалпы наркы 2 миллиард долларды түзөт.
“Ош ситинин” акылдуу шаар концепциясы заманбап технологияларды колдонуу менен шаар тургундарынын жашоо сапатын жакшыртууга багытталган. Бул концепциянын алкагында санариптик инфраструктура, энергияны үнөмдөөчү системалар, коопсуздук чаралары жана экологиялык таза чөйрө түзүлөт.
Кыргызстанда буга чейин дагы бир нече акылдуу шаар долбоорлору сунушталган. Мисалы, Бишкек шаарында “Бишкек Сити” деп аталган көп тармактуу комплекс курулуп жатат. Анда беш жылдыздуу мейманкана, бизнес-борбор жана соода аянттары каралган. Долбоордун баасы 321 миллион АКШ долларын түзөт.
Мындан тышкары, Ысык-Көл облусунда “Асман сити” деген шаар курулушу пландалууда. Бул долбоордун жалпы наркы 20 миллиард доллар деп бааланган жана ал 500 миң кишиге ылайыкталган.
Ал эми “Ош Сити” акылдуу шаарчасынын курулушу Ош шаарынын өнүгүүсүнө чоң салым кошуп, тургундардын жашоо шарттарын жакшыртууга багытталган ири долбоорлордун бири болуп санала турганын белгилешүүдө. Бул сыяктуу долбоорлор Кыргызстандын башка аймактарында да ишке ашырылып, өлкөнүн экономикалык жана социалдык өнүгүүсүнө өбөлгө түзөрүнөн үмүттөнүшүүдө.



















