Ош шаарынын ичиндеги мүрзөлөр сыртка чыгарылыш керек. Бул тууралуу Ош шаарынын мэри Жеңишбек Токторбаев шаардык кеңештин сессиясында сүйлөп жатып билдирди.
“Мүрзө жайгашкан жерлерге кирип карасам, абалы аябай начар, сасып кетиптир, антисанитария. Мен түшүнөм, баарыбыз мусулманбыз. Баарыбыздын барар жерибиз мүрзө. Бирок муну качандыр бир убакта, кимдир бирөө жасаш керек болчу. Ошондуктан шаардын сыртына көчүрүп чыгарышыбыз керек”,-деди мэр.
Ал облустук балдар ооруканасы тарапта жайгашкан Ош көчөсүндөгү мүрзө тууралуу сөз кылды.
“Ал жерге жаңы сөөктөрдү коюуну токтотуп, шаардын сыртына чыгарышыбыз керек. Ооба, бир кезде шаар кичине болчу, азыр кирди-чыкты менен шаардын эли миллионго жетип калды. Буюрса дагы 10 жылда 1-1,5 млн болуп кетебиз”,-деди Токторбаев.
Ош шаарынын ичинде бир канча мүрзөлөр бар, бирок негизги мүрзө шаардын сыртында. Буга чейин коомчулукта Сулайман-Тоонун күңгөй тарабындагы мүрзөлөрдү чыгаруу керек деген пикирлер айтылып келген. Бирок аталган тоо ЮНЕСКОнун баалуу мурастар тизмесине киргендиктен, мүрзө да аны менен кошо мурас катары катталганын, ошондуктан ал жылдырылбаш керектигин “Сулайман-Тоо” археологиялык музей комплексинин башчысынын орун басары Хайрулла Убайдуллаев “Eurasia Today” сайтына билдирди.
“Бул көрүстөнгө качан эле сөөк коюуга тыюу салынган. Бирок ал көрүстөн ЮНЕСКОнун тизмесине эстелик катары катталып калган. Негизи Сулайман-Тоодогу мүрзөлөргө белгилүү аалымдардын сөөгү коюлган деген элдик ишенимдер бар”,-деди ал.
Белгилей кетсек, белгилүү композитор, ырчы Рыспай Абдыкадыровдун сөзү Сулайман-Тоосундагы мүрзөгө коюлган.
Ош шаарынын жаңы мэри Жеңишбек Токторбаев кызматка келгенден бери шаардын көчөлөрүн тынымсыз кыдырып, мыйзамсыз курулуштарды алуу иштерин күчөттү. Айрыкча, кызыл сызыкты бузуп салынган объекттерди четтетүүгө басым жасап, шаардык инфраструктураны иретке келтирүү аракетин көрүүдө. Мындай иштер Ош облусунун Кара-Суу, Араван, Ноокат, Алай жана Өзгөн райондорунда да жүрүүдө.



















