Бүгүн, 22-январда Ташкентте Орусия менен Өзбекстандын коргоо министрликтери 2025-жылга карата кызматташуу планына жана эки өлкөнүн 2026-2030-жылдарга аскердик тармактагы стратегиялык өнөктөштүк программасына кол коюшту.
Бул тууралуу Орусиянын Коргоо министрлигинин башчысы Андрей Белоусов билдиргенин орус ЖМКлары жазышты.
Документтерге Орусиянын коргоо министри Андрей Белоусов жана Өзбекстандын коргоо министри Шухрат Халмухамедов кол коюшту.
Салтанат Орусиянын Коргоо министринин Өзбекстанга расмий сапарынын алкагында өттү.
Орусиянын Аскердик ведомствосунун маалыматы боюнча, Орусия менен Өзбекстандын коргоо министрликтеринин 2025-жылга карата кызматташуу планына эки өлкөнүн аскер ведомстволорунун ишмердүүлүгүнүн бардык багыттары боюнча 50 биргелешкен иш-чара киргизилген.
Сапардын жүрүшүндө Орусиянын Коргоо министрлигинин башчысы өзбек кесиптеши менен сүйлөшүүлөрдү жүргүзүп, анын жүрүшүндө Москва менен Ташкенттин өнөктөштүгү өз ара түшүнүшүүнүн жогорку деңгээлине жеткенин жана мындан ары да кеңейип жатканын билдирди.
“Бул азыркы эл аралык кырдаалда өзгөчө маанилүү”, – деп белгилеген ал эки өлкөнүн биргелешкен иши Борбор Азия аймагында коопсуздукту камсыз кылууга олуттуу таасирин тийгизет деп түшүндүрдү.
Ал Ташкентке келген орусиялык делегациянын курамында аскердик жана аскердик-техникалык кызматташтык маселелери менен алектенген уюмдардын жетекчилери бар экенин жана бул жолугушуу эки өлкөнүн коргоо тармагындагы кызматташуусунун жаңы этабынын башталышын белгилей тургандыгына ишеним артарын билдирди.
Өз кезегинде Өзбекстандын аскердик ведомствосунун башчысы Шухрат Халмухамедов Өзбекстандын Коргоо министрлиги регионалдык коопсуздукту камсыздоо жаатында Орусия менен эки тараптуу кызматташуунун деңгээлин жогору баалай турганын жана аны мындан ары өнүктүрүүгө кызыкдар экенин белгиледи.
2017-жылы Москва менен Ташкент аскердик-техникалык кызматташтыкты өнүктүрүү боюнча келишимге кол коюшкан, анда аскердик продукцияны өз ара жеткирүү, курал-жарактарды жана аскердик техникаларды тейлөө жана оңдоо, аскердик-техникалык жардам көрсөтүү, илимий-изилдөө жана тажрыйба-конструктордук иштерди жүргүзүү камтылган.


















